ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន អញ្ជើញដឹកនាំកិច្ចប្រជុំត្រួតពិនិត្យការងារនិងដំណើរការរៀបចំសន្និបាតបូកសរុបការងារនិងលើកទិសដៅការងារឆ្នាំ២០២៤
ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន បានអញ្ជើញដឹកនាំកិច្ចប្រជុំត្រួតពិនិត្យការងារនិងដំណើរការរៀបចំសន្និបាតបូកសរុបការងារ និងលើកទិសដៅការងារឆ្នាំ២០២៤ របស់ក្រសួងព័ត៌មាន បានធ្វើឡើងនៅរសៀលថ្ងៃទី១៨ ខែមករា ឆ្នាំ២០២៤ នាសាលប្រជុំព្រះវិហារ ទីស្តីការក្រសួង ។
របៀបវារៈនៃកិច្ចប្រជុំរួមមាន ការលើកបង្ហាញពីបច្ចុប្បន្នភាពការងាររបស់អនុគណៈកម្មការ
ក្នុងនោះមាន អនុគណៈកម្មការខ្លឹមសារ ឯកសារ និងព័ត៌មានផ្សព្វផ្សាយ,
អនុគណៈកម្មការពិធីការ បដិសណ្ឋារកិច្ច សន្តិសុខ និងសណ្តាប់ធ្នាប់,
អនុគណៈកម្មការផ្គត់ផ្គង់ និងហិរញ្ញវត្ថុ,
កិច្ចប្រជុំក៏នឹងលើកពីចំណាត់ការការងារបន្តរបស់គណៈកម្មការរៀបចំសន្និបាតបូកសរុបការងារ និងលើទិសដៅ ការងារឆ្នាំ២០២៤ រួមទាំងកិច្ចការងារផ្សេងៗទៀត ។
ឯកឧត្តម រដ្ឋមន្រ្តី នេត្រ ភក្ត្រា កិច្ចប្រជុំនាឱកាសនេះ ដើម្បីធ្វើបច្ចុប្បន្នភាព ទាក់ទងទៅនិងកិច្ចការងារ ត្រៀមរៀបចំសន្និសន្និបាតបូកសរុបការងារ និងលើទិសដៅ ការងារឆ្នាំ២០២៤ របស់ក្រសួងព័ត៌មាន ដែលត្រូវធ្វើឡើងរយៈពេល ២ ថ្ងៃ គឺនៅថ្ងៃទី២២ និង ២៣ ខែមករា ឆ្នាំ២០២៤ ដោយចែកចេញកម្មវិធីនៅថ្ងៃទី២២ និងព្រឹកថ្ងៃទី២៣ ធ្វើនៅទីស្តីការក្រសួងព័ត៌មាន ដោយឡែកនៅពេលរសៀលថ្ងៃទី២៣ នឹងរៀបចំពិធីបិទសន្និបាតបូកសរុបការងាររបស់ក្រសួងព័ត៌មាន នៅសណ្ឋាគារសុខាភ្នំពេញ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ។
ឯកឧត្តម រដ្ឋមន្រ្តី នេត្រ ភក្រ្តា បានគូសបញ្ជាក់ថា សន្និបាត ដែលនឹងធ្វើឡើងនាពេលខាងមុខនេះ ដើម្បីជាការតម្រង់ទិសក្នុងកិច្ចការងារទៅមុខរបស់ក្រសួងព័ត៌មាន ឈានទៅរកគោលដៅដែលបានដាក់ចេញ សំដៅធ្វើអោយក្រសួងព័ត៌មាន កាន់តែរឹងមាំក្នុងការគ្រប់គ្រង ការពង្រឹងគុណភាពវិស័យព័ត៌មាន និងសោតទស្សន៍ នៅកម្ពុជាកាន់តែរីកចំរើន ។
តាមកម្មវិធីនៃអង្គសន្និបាតបូកសរុបការងារប្រចាំឆ្នាំរបស់ក្រសួងព័ត៌មាន គឺនឹងមានកិច្ចពិភាក្សាលើការគ្រប់គ្រង និងអភិវឌ្ឍវិស័យព័ត៌មាន និងសោតទស្សន៍ សមិទ្ធផល ទិសដៅការងារ បញ្ហាប្រឈម ដំណោះស្រាយ សំណូមពរ និងចក្ខុវិស័យទៅថ្ងៃខាងមុខ ។
ពិភាក្សាលើការលើកកម្ពស់បទដ្ឋានបច្ចេកទេស ដើម្បីរក្សាសណ្តាប់ធ្នាប់ក្នុងវិស័យមាន និងសោតទស្សន៍ តម្រូវការបទដ្ឋានគតិយុត្ថ ។
អង្គសន្និបាតក៏គ្រោងពិភាក្សាទាក់ទងសណ្តាប់ធ្នាប់ក្នុងវិស័យព័ត៌មាន ការកំណត់ការផ្សាយពីអាណាឡូក ទីឌីជីថល ត្រឹមឆ្នាំ២០២៥ ។
ជាមួយនេះក៏ជម្រុញការពង្រឹងគុណភាពព័ត៌មាន ការគ្រប់គ្រងសមាគមអ្នកសារព័ត៌មាន និងការចុញបញ្ជី ការប្រតិបត្តិវិជ្ជាជីវៈ និងក្រមសីលធម៍ ការគ្រប់គ្រងការផ្សាយ ឌីជីថល និងអង្គភាពបរិវត្តកម្ម ឌីជីថល ។
ទន្ទឹមជាមួយគ្នានេះផងដែរ ក៏នឹងមានកិច្ចពិភាក្សាទៅលើការគ្រប់គ្រងស្ថាប័ន និងការងារកំណែទម្រង់របស់ក្រសួងព័ត៌មាន រួមមានការងារកែទម្រង់រដ្ឋបាលសាធារណៈ ការងារកែទម្រង់ការគ្រប់គ្រងហិរញ្ញវត្ថុសាធារណៈ កំណែទម្រង់វិមជ្ឍការ និងវិសហមជ្ឍការ ។
ការងារនីតិកម្មក្រសួងព័ត៌មាន គឺទំនើបកម្មច្បាប់ និងការគ្រប់គ្រងព័ត៌មាន ។
ក្រៅកិច្ចការងារសំខាន់ៗខាងលើនេះ ក៏នឹងមានកិច្ចពិភាក្សាលើ ការអភិវឌ្ឍធនធានមនុស្សក្នុងវិស័យព័ត៌មាន និងសោតទស្សន៍ ការងារអធិការកិច្ច សវនកម្ម ស្រ្តី និងយេនឌ័រ ៕
