បើតាមផេកផ្លូវការរបស់ស្នងការដ្ឋាននគរបាលខេត្តកំពង់ស្ពឺ បានបង្ហាញថា អ្នកបើកបរមានឈ្មោះ សៅ ប៉ិចពន្លឺ ភេទប្រុស អាយុ៣២ឆ្នាំ មានទីលំនៅសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ បានកែច្នៃរថយន្ដ ដាក់ទ្រុងដឹកទំនិញពីលើដំបូល និងតកន្ទុយចង្អើរដែកហួសតួរថយន្ដ នៃផ្នែកខាងក្រោយ ។
សមត្ថកិច្ចខេត្តកំពង់ស្ពឺ បានលើកឡើងថា យោងតាមច្បាប់ ករណីនេះត្រូវកំណត់ដូចខាងក្រោម ៖
ការកែច្នៃយានយន្តខុសបទដ្ឋានបច្ចេកទេស គឺជាការកែច្នៃបច្ចេកទេសលើយានយន្តខុសពីរោងចក្របានផលិត ដូចជាការកែច្នៃយានឲ្យដឹកបានច្រើន ឫលូតកម្ពស់ ឫលូតបណ្តោយ ដែលកាន់តែបន្ថែមទម្ងន់ដល់យាន ឫអាចធ្លាក់ អាចប៉ះ បង្កគ្រោះថ្នាក់ ។
ករណីកែច្នៃអាចធ្វើទៅបាន លុះត្រាមានការអនុញ្ញាតពីក្រសួងសាធារណការ និងដឹកជញ្ជូន ដូចមានចែងក្នុងអនុក្រឹត្យលេខ ១៨០ ។
ការកែច្នៃ ដែលគ្មានការអនុញ្ញាត ពីក្រសួងសាធារណការ និងដឹកជញ្ជូន នឹងត្រូវចាត់ទុកជាការកែច្នៃខុសបទដ្ឋានបច្ចេកទេស ដែលត្រូវពិន័យតាមអនុក្រឹត្យលេខ៣៩ ។ ជាមួយនោះមាត្រា៦៦ នៃច្បាប់ស្តីពីចរាចរណ៍ផ្លូវគោក បានតម្រូវឲ្យឃាត់យានយន្ត ដើម្បីកែតម្រូវលក្ខណៈបច្ចេកទេសទៀតផង ។
ការចាប់ឃាត់ និងផាកពិន័យម្ចាស់រថយន្តខាងលើនេះ ក៏មានមតិមួយចំនួនតូច បានធ្វើការរិះគន់នៅលើបណ្ដាញសង្គមហ្វេសប៊ុក ទៅលើមន្ត្រីនគរបាលចរាចរណ៍ ថា ជាការហួសហេតុ និងផ្ទុយពីច្បាប់ទៅវិញ ៕
