រាជធានីភ្នំពេញ ៖ ជាគ្រោះអកុសលមួយដែលនឹកស្មានពុំដល់ និងកើតឡើងដោយកម្រ ខណៈពេលដែលយុវជនជាកម្មករម្នាក់កំពុងតែលើកដាក់ភេសជ្ជៈលើរ៉ឺម៉ក ដើម្បីដឹកឲ្យម៉ូយសុខៗ ស្រាប់តែខ្សែកាប្លិ៍ភ្លើងស្រាតដែលស្ថិតនៅពីលើនោះបានទុស្សេ រួចដាច់ធ្លាក់ចុះមកលើដីជិតយុវជនរងគ្រោះ។ ភ្លាមៗនោះយុវជនរូបនេះបានយកបំពង់ពន្លត់អគ្គិភ័យ១បំពង់ទៅបាញ់ពន្លត់ព្រោះខ្លាចឆេះអីវ៉ាន់ថៅកែ តែអកុសលខ្សែកាប្លិ៍ភ្លើងនោះបានដាច់ធ្លាក់រួចមកវ័ធត្រូវ បណ្ដាលឲ្យឆក់យុវជនរងគ្រោះឆេះរលាករលួយខ្លួនប្រាណ និងដៃជើងខ្លោច ហើយក៏ដួលស្លា.ប់ភ្លាមៗនៅនឹងកន្លែងតែម្ដង បង្កឲ្យមានការភ្ញាក់ផ្អើលកាលពីម៉ោង៨និង១០នាទីព្រឹក ថ្ងៃទី១០ ខែសីហា ឆ្នាំ២០២១ នៅចំណុចផ្ទះលក់ភេសជ្ជៈ និងគ្រឿងទេសយីហោ «ប៊ុន សោភា» មានទីតាំងស្ថិតនៅតាមបណ្ដោយផ្លូវលេខ៣៧១ ក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
យុវជនរងគ្រោះខាងលើនោះមានឈ្មោះ ឡុង រីន អាយុ២៣ឆ្នាំ មុខរបរជាកម្មករដឹកអីវ៉ាន់ឲ្យដេប៉ូលក់បោះដុំភេសជ្ជៈខាងលើ មានទីលំនៅក្នុងសង្កាត់បឹងទំពុន២ ខណ្ឌមានជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនពេលកើតហេតុ បុរសរងគ្រោះបានលើកភេសជ្ជៈដាក់នៅលើម៉ូតូសណ្ដោងរ៉ឺម៉ក១គ្រឿង ដើម្បីដឹកចេញពីផ្ទះថៅកែយកទៅដើរដាក់ឲ្យម៉ូយៗ ។ ខណៈពេលនោះ ស្រាប់តែមានហេតុការណ៍ឆ្លងចរន្តអគ្គិសនីឆាបឆេះខ្សែកាប្លិ៍ភ្លើងស្រាត នៅខាងលើដំបូលដេប៉ូលក់ដូរ យ៉ាងសន្ធោរសន្ធៅតែម្តង ។
ប្រភពដដែលបន្តថា បន្ទាប់ពីបានឃើញបែបនេះ បុរសរងគ្រោះក៏បានយកបំពង់ពន្លត់អគ្គិភ័យទៅបាញ់ពន្លត់ ព្រោះខ្លាចឆាបឆេះដល់ដេប៉ូបោះដុំរបស់ថៅកែ តែជាអកុសលក៏ត្រូវបានខ្សែកាប្លិ៍ភ្លើងនោះដាច់ធ្លាក់ចុះមក រួចវ័ធត្រូវជនរងគ្រោះ បណ្តាលឱ្យឆក់ឆាបឆេះរលាករលួយខ្លួនប្រាណ និងដៃជើងខ្លោច ហើយក៏ដួលស្លា.ប់ភ្លាមៗយ៉ាងអាណោចអធ័មតែម្តង។
ប្រភពដដែលបានបន្តទៀតថា នៅពេលខ្សែភ្លើងកំពុងតែដាច់ធ្លាក់នោះ ក៏មានបុរសម្នាក់ជិះម៉ូតូទៅដល់ ហើយម៉ូតូបែកកង់ និងស្ទើរតែត្រូវខ្សែកាប្លិ៍ភ្លើងនោះវ័ធត្រូវទៅហើយ តែសំណាងល្អគាត់រត់គេចផុតទាំន់ កុំអីត្រូវឆក់ស្លា.ប់ដែរហើយ។ ប៉ុន្តែម៉ូតូរបស់គាត់ត្រូវបានភ្លើងឆាបឆេះ បណ្ដាលឲ្យរងការខូចខាត ហើយក្រោយពេលកើតហេតុ កម្លាំងនគរបាលប៉ុស្តិ៍ដង្កោ ក៏បានចុះទៅកាន់ទីនោះ ហើយបានរាយការណ៍ជូនទៅកាន់មន្ត្រីអគ្គិសនីឲ្យចុះទៅពិនិត្យមើលខ្សែភ្លើងដែលដាច់ ព្រមទាំងបិទចរន្តភ្លើងជាបណ្ដោះអាសន្នសិន។ ចំណែកអ្នកដំណើរតាមផ្លូវវិញនោះ ក៏ត្រូវបានហាមឃាត់មិនឲ្យឆ្លងកាត់ រហូតដល់ពេលចរន្តភ្លើងត្រូវបិទរួចរាល់ផងដែរ ៕
