ខេត្តបន្ទាយមានជ័យ៖ មជ្ឈមណ្ឌលជីវិតថ្មី ភ្នំបាក់ ដែលជាកន្លែងបន្សាបគ្រឿងញៀន បានអ្នករកឃើញវិជ្ជមានកូវីដ ១៩ ចំនួន ១៣២នាក់ ក្នុងចំណោមអ្នកធ្វើតេស្តជិត ៧០០នាក់។ ក្នុងនោះ នៅខេត្តបន្ទាយមានជ័យ មានអ្នកឆ្លងកូវីដ១៩ ចំនួន ៣៨៧នាក់ នៅថ្ងៃទី១៧ ខែសីហា ឆ្នាំ២០២១។
លោក ភា មានិត ប្រធានមជ្ឈមណ្ឌលជីវិតថ្មី ភ្នំបាក់ បានអោយដឹងនៅថ្ងៃទី១៧ ខែសីហា ឆ្នាំ២០២១ ថា នៅថ្ងៃទី១៦ ដល់ថ្ងៃទី១៧ ខែសីហា ឆ្នាំ២០២១ នេះ មណ្ឌលកែប្រែជីវិតថ្មី ភ្នំបាក់ បានរកឃើញវិជ្ជមានកូវីដ១៩ ចំនួន ១៣២នាក់ ក្នុងនោះ មានមន្ត្រីបម្រើការងារ ក្នុងមណ្ឌលចំនួន ៣នាក់ បានឆ្លងកូវីដ.១៩ ក្នុងចំណោមមន្ត្រីសរុប ១៥នាក់។
លោកបានបញ្ជាក់ថា ជាការខិតខំយកចិត្តទុកដាក់ពីអភិបាលបាលខេត្តបន្ទាយមានជ័យ ឯកឧត្តម អ៊ុំ រាត្រី ទាំងគ្រូពេទ្យ ប្រចាំក្នុងមណ្ឌល សហការជាមួយគ្រូពេទ្យចល័តរបស់មន្ទីសុខាភិបាលខេត្ត បានជួយយកសំណាក់យុវជន ដែលកំពុងកែប្រែ និងមន្ត្រីបម្រើការងារ រយៈពេល ២ថ្ងៃ ទើបតែបាន ក្នុងចំណោម ៦៧០នាក់ ដែលរកឃើញវិជ្ជមានកូវីដ.១៩ ចំនួន ១៣២នាក់ ហើយត្រូវញែកអ្នកវិជ្ជមានកូវីដ.១៩ ដាក់ ១កន្លែង ដើម្បីព្យាបាល និងអ្នកអវិជ្ជមាន អោយធ្វើចត្តាឡីស័ក តាមការកំណត់ ដែលត្រូវយកសំណាក់បន្ត។
រដ្ឋបាលខេត្តបន្ទាយមានជ័យ បានប្រកាសព័ត៌មាន នៅថ្ងៃទី១៧ ខែសីហា ឆ្នាំ២០២១ ពីការរកឃើញវិជ្ជមានកូវីដ.១៩ ចំនួន ៣៨៧នាក់ ដែលភាគច្រើន រកឃើញយុវជន ដែលកំពុងកែប្រែ ក្នុងមណ្ឌលកែប្រែជីវិតថ្មី ភ្នំបាក់ និងពលករ ដែលត្រឡប់ពីប្រទេសថៃ ចូលមកកម្ពុជា៕
