មន្ត្រីជំនាញ ក.ប.ប. សាខា ខេត្តកណ្តាលបង្ក្រាបបាន ចាហួយដូងម៉ាក (Thanh Binh) ជិត ៤០០គីឡូក្រាម នាំចូលពីវៀតណាម

កណ្ដាល៖ មន្ត្រីជំនាញសាខា ក.ប.ប. ខេត្តកណ្តាល នៅថ្ងៃទី ២២ ខែ មេសា ឆ្នាំ ២០២២ នេះ បានចុះត្រួតពិនិត្យទំនិញនានា នៅស្រុកស្អាង ខេត្តកណ្ដាល ដោយបានរកឃើញនូវទំនិញចាហួយដូងម៉ាក (Thanh Binh) ចំនួន ៣៩កេស និង ៥កញ្ចប់ធំ ទម្ងន់ ៣៩៥គីឡូក្រាម ដែលជាទំនិញហាមឃាត់ ។
បើតាមលោក តូច ចៅកុយ ប្រធានសាខា ក.ប.ប. ខេត្តកណ្តាល បានបញ្ជាក់ប្រាប់ឱ្យដឹងថា ក្នុងប្រតិបត្តិការនេះ មន្ត្រីជំនាញបានចុះត្រួតពិនិត្យដេប៉ូ ចែកចាយទំនិញចំនួន ៣ទីតាំង និងសិប្បកម្ម ១ទីតាំង ស្ថិតនៅក្នុងឃុំ ត្រើយស្លា ស្រុកស្អាង ខេត្តកណ្តាល (សរុប ៤ទីតាំង) ក្នុងនោះរកឃើញមួយកន្លែងបានដាក់លក់នូវប្រភេទទំនិញចាហួយដូងម៉ាក (Thanh Binh) នាំចូលពីវៀតណាមខុសច្បាប់ ដែលទំនិញនេះត្រូវបានរាជរដ្ឋាភិបាលកម្ពុជា ហាមឃាត់តាំងពីឆ្នាំ ២០១៦ ជាទំនិញគ្មានគុណភាព មានផ្ទុកសារធាតុគីមីដែលបង្កគ្រោះថ្នាក់ដល់អាយុជីវិត និងបង្កជាជំងឺធ្ងន់ធ្ងរផ្សេងៗ ។
លោកបន្តថា ម្ចាស់ទីតាំងដែលលក់ដូរចាហួយនេះ ត្រូវបានមន្ត្រីជំនាញធ្វើការពិន័យអន្តរការណ៍ និងបានអប់រំ ព្រមទាំងព្រមានផ្លូវច្បាប់ផងដែរ បើសិនជានៅតែបន្តលក់ដូរ និងនាំចូលមកម្ដងទៀត ៕