នៅព្រឹក ថ្ងៃព្រហស្បតិ៍ ១កើត ខែពិសាខ ឆ្នាំថោះ បញ្ចស័ក ព.ស. ២៥៦៦ ត្រូវនឹង ថ្ងៃទី២០ ខែមេសា ឆ្នាំ២០២៣ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជាអធិបតីភាពដ៏ខ្ពង់ខ្ពស់នៅក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវអគារសម្ភព ស្ថិតនៅក្នុងបរិវេណនៃមន្ទីរពេទ្យកុមារជាតិ។ នេះជាលើកទី ៤ ដែលសម្តេចនាយករដ្ឋមន្ត្រី បានអញ្ជើញចូលរួមសម្ពោធដាក់ឱ្យប្រើប្រាស់អគារនៅមន្ទីរពេទ្យកុមារជាតិ។ អគារសម្ភពនេះមានកម្ពស់ ៤ ជាន់ដែលអាចដាក់អ្នកជំងឺបានប្រមាណ ១០០ គ្រែ។ អគារមន្ទីរពេទ្យថ្មីបន្ថែមទៀតនេះ នឹងជួយលើកកម្ពស់សុខុមាលភាពមាតា និងកុមារកាន់តែប្រសើរបន្ថែមទៀត ព្រោះអគារនេះមានបំពាក់នូវបរិក្ខាពេទ្យទំនើបៗ និងមានប្រើប្រាស់ប្រព័ន្ធឌីជីថលក្នុងការគ្រប់គ្រងទិន្នន័យ និងប្រវត្តិអ្នកជំងឺបានច្បាស់លាស់ងាយស្រួល ក្នុងការផ្ដល់សេវាព្យាបាលអ្នកជំងឺបានលឿនរហ័សប្រកបដោយគុណភាពនិងប្រសិទ្ធិភាពខ្ពស់។ អគារសម្ភពថ្មីនេះមានទទឹង ១៥ ម៉ែត្រ និងបណ្តោយ ៦០ ម៉ែត្រមានកម្ពស់៤ជាន់ ចាប់ផ្ដើមសាងសង់នៅខែកម្ភៈឆ្នាំ២០២១ ហើយបញ្ចប់ការសាងសង់ និងបើកឱ្យដំណើរការនៅខែកញ្ញាឆ្នាំ២០២២ ដោយចំណាយថវិការបស់រាជរដ្ឋាភិបាល។ អគារថ្មីនេះមានបំពាក់សម្ភារបរិក្ខាពេទ្យទំនើបៗ ជាជំនួយរបស់ប្រទេសឆេក ដោយមានផ្តល់សេវាពិគ្រោះជំងឺកុមារ ពិនិត្យផ្ទៃពោះ ចាក់ថ្នាំបង្ការកុមារ រោគស្ត្រី សម្រាលកូន ផ្នែកវះកាត់និងទារកមានបញ្ហាផ្សេៗក្រោយសម្រាល។ […]
ភ្នំពេញ ៖ ការថ្លែងអំពីគុណតម្លៃនៃសន្ដិភាព បានធ្វើឡើងក្នុងពេលសម្ដេចអញ្ជើញ ប្រគល់សញ្ញាបត្រដល់គរុនិស្សិតបច្ចេកទេស និងនិស្សិតជាង ៥ពាន់នាក់ ដែលបានបញ្ចប់ការសិក្សាដោយជោគជ័យពីវិទ្យាស្ថានជាតិបណ្តុះបណ្តាលបច្ចេកទេស នាព្រឹកថ្ងៃចន្ទ ទី២៧ ខែកុម្ភៈ ឆ្នាំ២០២៣នេះ។ សម្ដេចតេជោ ហ៊ុន សែន នាយករដ្ឋមន្រ្ដី បានប្រាប់ដល់គរុនិស្សិតដែលកំពុងចូលរួមកម្មវិធីដោយផ្ទាល់ និងប្រជាជនដែលកំពុងតាមដានស្ដាប់ការផ្សាយផ្ទាល់ ថា ប្រទេសទាំងអស់នៅលើពិភពលោក ដែលអភិវឌ្ឍទៅបាន គឺសុទ្ធតែជាប្រទេសដែលកំពុងតែមានសន្ដិភាព។ សម្ដេចតេជោ បន្តថា សម្រាប់កម្ពុជា ដំណើរការអភិវឌ្ឍ នឹងមិនស្ថិតនៅទ្រឹងមួយកន្លែងនោះឡើយ ពោលដំណើរអភិវឌ្ឍនឹងបន្តឆ្ពោះទៅមុខទៀត ដោយសារតែកត្តានយោបាយរក្សាបានស្ថិរភាព ហើយពិសេសគឺកម្ពុជារក្សាបានសន្ដិភាពពេញលេញ។ ព្រោះតែកត្តាសន្ដិភាពជាចំណុចស្នូលនៃការចាប់ផ្ដើមការអភិវឌ្ឍ ទើបរាជរដ្ឋាភិបាលបន្តការពារសុខសន្ដិភាពយ៉ាងម៉ឺងម៉ាត់។ សម្ដេចតេជោ ហ៊ុន សែន បន្ថែមទៀត កម្ពុជាត្រូវខិតខំរក្សាសន្ដិភាពឲ្យបាន ហើយមិនយូរទេ កម្ពុជានឹងចាកចេញពីប្រទេស អភិវឌ្ឍតិចតូច។ បច្ចុប្បន្ននេះកម្ពុជាបានស្រូបទាញអ្នកវិនិយោគយ៉ាងច្រើនមកពីបរទេស ដើម្បីបណ្ដាក់ទុក បើករោងចក្រ និងរកស៊ីនៅកម្ពុជា។ អ្វីដែលនាំឲ្យក្រុមអ្នកវិនិយោគធ្វើដំណើរមកកម្ពុជា ព្រោះកម្ពុជាមានសន្ដិភាព គ្មានជម្លោះប្រដាប់អាវុធ គ្មានស្ថានភាពអាណាធិបតេយ្យ បង្កបញ្ហាដល់ក្រុមអ្នកវិនិយោគ។ ព្រោះតែកត្តាសន្ដិភាព ស្ថិរភាព ជាចំណុចសំខាន់ទើបរាជរដ្ឋាភិបាល ខិតខំគ្រប់ពេលវេលា ក្នុងការការពារសុខសន្ដិភាព និងទប់ស្កាត់រាល់សកម្មភាពក្រុមជ្រុលនិយម […]
រដ្ឋមន្រ្តីក្រសួងធម្មការ និងសាសនា បានដាក់ចេញវិធានការមួយចំនួន ដើម្បីចូលរួមក្នុងការប្រយុទ្ធប្រឆាំងជំងឺកូវីដ-១៩ សម្រាប់ថ្ងៃបុណ្យកាន់បិណ្ឌនិងភ្ជុំបិណ្ឌ ព្រមទាំងបុណ្យកឋិន ដែលនឹងត្រូវចាប់ផ្តើមក្នុងពេលខាងមុខនេះ។ រដ្ឋមន្រ្តីក្រសួងធម្មការ និងសាសនា លោក ឈិត សុខុន បានលើកឡើងក្នុងសេចក្តីប្រកាសព័ត៌មានកាលពីថ្ងៃទី៣ ខែកញ្ញា ថាគ្រប់មន្ទីរធម្មការ និងសាសនា រាជធានី-ខេត្ត ត្រូវយកចិត្តទុកដាក់និងបង្កលក្ខណៈងាយស្រួលឱ្យបានល្អប្រសើរដល់ទីតាំងសម្រាប់ប្រគេនព្រះសង្ឃ និងរៀបចំជូនពុទ្ធបរិស័ទប្រារព្ធពិធីបុណ្យកាន់បិណ្ឌ ភ្ជុំបិណ្ឌ និងបុណ្យកឋិនទាន។ សេចក្តីប្រកាសព័ត៌មានដដែលបញ្ជាក់ទៀតថា ដើម្បីបង្ការនិងទប់ស្កាត់ការចម្លងជំងឺកូវីដ-១៩ នៅថ្ងៃបុណ្យប្រពៃណីជាតិខាងមុខនេះ ស្ថាប័ននិងអ្នកពាក់ព័ន្ធត្រូវអនុវត្តវិធានការនានារបស់ក្រសួងសុខាភិបាល ដូចជា ពាក់ម៉ាស់ រក្សាគម្លាត វាស់កម្តៅ លាងដៃដោយសាប៊ូ អាល់កុល ឬជែល និងត្រូវរក្សាគោលការណ៍ ៣កុំ និង៣ការពារ។ ពិធីបុណ្យកាន់បិណ្ឌនិងភ្ជុំបិណ្ឌនេះ នឹងប្រព្រឹត្តទៅចាប់ពីថ្ងៃទី២២ ខែកញ្ញា រហូតដល់ថ្ងៃទី៦ ខែតុលា ឆ្នាំ២០២១។ បើតាមសេចក្តីប្រកាសព័ត៌មានដដែលនេះ គ្រប់វត្តអារាមត្រូវសម្អាតបូជនីយស្ថាន ស្តូប កន្លែងតម្កល់អដ្ឋិធាតុអ្នកដែលបាត់បង់ជីវិតក្នុងរបបប្រល័យពូជសាសន៍ និងតុបតែងលម្អដោយបំភ្លឺភ្លើងពណ៌ លើកទង់ជាតិ ទង់សាសនា និងទង់ព្រះមហាក្សត្រ រួមទាំងរៀបចំឱ្យមានជាបដាពាក្យស្លោក ដើម្បីចូលរួមអបអរសាទតាមប្រពៃណីព្រះពុទ្ធសាសនា៕
