តាមរយៈតេឡេក្រាមនៅរសៀលថ្ងៃទី១៩ ខែមីនា ឆ្នាំ២០២៣នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសជូនបងប្អូនជនរួមជាតិថា រឿង “កូនប្រុសក្រោមពន្លឺព្រះចន្ទពេញបូណ៌មី” នឹងត្រូវចាក់ផ្សាយនៅថ្ងៃទី២០ ខែមីនា ឆ្នាំ២០២៣ ស្អែកនេះ តាមកញ្ចក់ទូរទស្សន៍បាយ័ន។ សម្ដេចតេជោបន្តថា កាលពីថ្ងៃទី១៣ ខែមីនា ឆ្នាំ២០២៣ សម្ដេចបាននិយាយថាឆាណែលតេលេក្រាមរបស់សម្ដេចនឹងចាក់ផ្សាយក្រោយទូរទស្សន៍បាយ័នក្នុងរង្វង់២ ឬ៣ម៉ោង។ អាស្រ័យដោយទូរទស្សន៍បាយ័នត្រូវចាក់ផ្សាយ បន្ទាប់មកត្រូវចាក់ផ្សាយឡើងវិញ ដូចនេះឆាណែលតេឡេក្រាមរបស់សម្ដេចនឹងចាក់ផ្សាយរយៈពេល ១០ម៉ោងយ៉ាងតិចក្រោយការផ្សាយរបស់ទូរទស្សន៍បាយ័ន។ សម្ដេចតេជោបញ្ជាក់ថា សម្ដេចនឹងបង្ហោះចេញម្តងមួយភាគជាមួយគ្នាតែម្តង។ គួរបញ្ជាក់ថា «រឿង កូនប្រុសក្រោមពន្លឺព្រះចន្ទពេញបូណ៌មី» ជាខ្សែភាពយន្តបែបប្រវត្តិសាស្រ្ត ដែលនិយាយពីដំណើរជីវិតតស៊ូរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដោយមានបញ្ចូលនូវព្រឹត្តិការណ៍សំខាន់ៗជាច្រើន ក្នុងការស្វែងរកសន្តិភាពជូនជាតិ និងប្រជាជនកម្ពុជា៕
លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នៅថ្ងៃទី០៥ ខែតុលា ឆ្នាំ២០២២នេះ បានបញ្ជាក់ឲ្យដឹងថា រយៈពេល៩ខែ ឆ្នាំ២០២២នេះ គឺចាប់ពីខែមករា ដល់ខែកញ្ញា អគ្គនាយកដ្ឋានគយ និងរដ្ឋាករកម្ពុជា បង្ក្រាបរថយន្ដគ្មានពន្ធ នៅទូទាំងប្រទេស បានចំនួនប្រមាណ៥១០គ្រឿងក្នុងនោះមានរថយន្តចង្កូតឆ្វេង ចំនួន៤៨២គ្រឿង និងរថយន្តចង្កូតស្ដាំចំនួន២៨គ្រឿង។ ទន្ទឹមគ្នានេះ លោក គុណ ញឹម បានលើកឡើងថា រថយន្តចង្កូតស្ដាំ ដែលនៅក្នុងយុទ្ធនាការ ឬដំណាក់កាល អនុញ្ញាតឲ្យចូលមកចុះបញ្ជីនោះ គឺមន្ត្រីអគ្គនាយកដ្ឋានគយ មានចេញក្រដាសមួយ ឲ្យម្ចាស់រថយន្ដដែលមកចុះបញ្ជីនោះ ដាក់ជាប់ក្នុងឡាន ដើម្បីនៅពេលមន្ដ្រីគយ ធ្វើអនុលោមភាព គាត់បង្ហាញប្រដាសនោះ ថាបានចុះបញ្ជីហើយ។ អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានឲ្យដឹងទៀតថា បើសិនជាមន្ត្រីអគ្គនាយកដ្ឋានគយ ឃាត់រថយន្ត ដើម្បីធ្វើអនុលោមភាព ហើយវាអត់មានក្រដាសនោះ និងអត់មានពន្ធនោះ រថយន្ដនោះ គឺជារថយន្តល្មើស គឺអគ្គនាយកដ្ឋានគយ និងរដ្ឋាករកម្ពុជា បង្ក្រាបតាមនីតិវិធីច្បាប់ជាធរមាន។ លើបញ្ហានេះ លោក គុណ ញឹម […]
សិស្សានុសិស្សចាប់ពីថ្នាក់ទី២ ដល់ថ្នាក់ទី៥ កំពុងសិក្សាក្នុងសាលាបឋមសិក្សាព្រះនរោត្តម ស្ថិតក្នុងរាជធានីភ្នំពេញ ចាប់ផ្ដើមរៀនសរសេរកូដតាមកុំព្យូទ័រ ក្រោមការរៀបចំរបស់ក្រសួងអប់រំ យុវជន និងកីឡា សហការជាមួយអង្គការ JICA នៃប្រទេសជប៉ុន និងកម្មវិធី Think Think ។ លោក ស៊ុណុសិ កិអ៊ុកុមារា អ្នកស្ម័គ្រចិត្តជួយបង្រៀនសរសេរកូដដល់កុមារកម្ពុជា បានលើកឡើងថា ទោះបីជាសិស្សទាំងអស់នេះមានអាយុតិចមែន ប៉ុន្តែពួកគេអាចរៀនសរសេរកូដបានក្នុងកម្រិតដំបូង ដែលការបង្រៀនគឺឥតគិតថ្លៃ ខណៈគម្រោងនេះមិនមែនជួយបង្រៀនតែក្នុងសាលាព្រះនរោត្តមមួយនោះទេ គឺចង់បង្រៀននៅគ្រប់សាលាទូទាំងប្រទេសកម្ពុជា រួមទាំង នឹងនាំសិស្សនិស្សិត ឬអ្នកស្ម័គ្រចិត្តជនជាតិជប៉ុន ដែលមានជំនាញលើផ្នែកឌីជីថល មកជួយបង្រៀនបន្ថែមផងដែរ។ លោកបានបន្ថែមថា ក្រៅពីបង្រៀនសិស្សតូចៗ លោកនឹងហ្វឹកហាត់បង្រៀនទៅដល់លោកគ្រូ អ្នកគ្រូ ដើម្បីឲ្យពួកគេអាចយកចំណេះដឹងផ្នែកឌីជីថលនេះ ទៅបង្រៀនបន្តដល់កូនសិស្ស នៅពេលដែលលោកត្រូវត្រឡប់ទៅប្រទេសជប៉ុនវិញ។
