ភ្នំពេញ ៖ ក្រោយពីសម្ដេចតេជោ ហ៊ុន សែន ប្រកាសបើកប្រទេសឡើងវិញលើគ្រប់វិស័យនានាកាលពីថ្ងៃទី០១ ខែវិច្ឆិកា ឆ្នាំ២០២១ និងអំពាវនាវសូមឲ្យប្រជាជនរៀនរស់ តាមបែបគន្លងថ្មី នៃបរិបទ ជំងឺកូវីដ១៩។ ក្រោយការប្រកាសនេះប្រជាជនចាប់ផ្ដើមរៀបចំពិធីរបស់ពួកគាត់ដែលលើកពេលជាយូរមកហើយនោះជាបណ្ដើរៗហើយ។ ចំពោះពីធីមង្គលការ សម្ដេចតេជោ ហ៊ុន សែន បានបញ្ជាក់ថា រាជរដ្ឋាភិបាលមិនបានហាមឃាត់នោះទេ គ្រាន់តែតម្រូវឲ្យរៀបចំក្នុងចំនួនមនុស្សតិចបង្ការហានិភ័យនៃការចម្លងជំងឺ។
ក្រោយពីមានការប្រកាសបែបនេះ គេសង្កេតឃើញថា ពិធីផ្សេងៗបានចាប់ផ្ដើមកម្រើកឡើងវិញហើយ ដោយប្រជាជនមួយចំនួនបានចាប់ផ្ដើមរៀបចំពិធីរបស់ពួកគាត់។ យោងតាមម្ចាស់ហាងបោះពុម្ពធៀបការ និងចុងភៅ នៅក្នុងរាជធានីភ្នំពេញ បានបញ្ជាក់ប្រាប់ឲ្យដឹងថា នៅពេលនេះអាជីវកម្មរបស់ពួកគាត់បានចាប់ផ្ដើមដំណើរការឡើងវិញខ្លះៗហើយ ដោយមានភ្ញៀវចាប់ផ្ដើមកក់សេវាកម្មរបស់ពួកគាត់ជាបណ្ដើរៗហើយ។
ស្រ្ដីមួយរូបជាម្ចាស់រោងពុម្ពធៀបការ និងធៀបពិធីផ្សេងៗ បានប្រាប់ថា ក្រោយពីសម្ដេចតេជោ ហ៊ុន សែន ប្រកាសបើកប្រទេស រោងបោះពុម្ពរបស់អ្នកស្រី បានទទួលការកម្មង់ពីអតិថិជនហើយ ក៏ប៉ុន្ដែមិនជាច្រើនប៉ុន្មាននោះទេ។ អ្នកស្រីបន្តថា ការកម្មង់ឲ្យបោះពុម្ពធៀបការតិចបែបនេះក៏ព្រោះអតិថិជនបារម្ភពីការចម្លងជំងឺ ហើយសម្រាប់អ្នកស្រីក៏គាំទ្រការរៀបចំពិធីដែលមានមនុស្សតិចបែបនេះដែរ។
ដូចគ្នាដែរម្ចាស់រោងពុម្ពមួយរូបទៀត អ្នកស្រីបានអះអាងថា ក្រោយពេលដែលសម្ដេចប្រកាសបើកប្រទេសឡើងវិញ រោងពុម្ពរបស់អ្នកស្រីចាប់ផ្ដើមមានអតិថិជនកក់ជាបណ្ដើរៗដែរ ប៉ុន្ដែចំនួនគឺតូចតូចប៉ុណ្ណោះសម្រាប់ពីធីនីមួយៗ។
ចំណែកម្ចាស់អាជីវកម្មចុងភៅនៅក្នុងរាជធានីភ្នំពេញ ក៏មានការកក់មួយចំនួនដែរ។ លោកបន្ថែមថា បើទោះបីជាមិនមានការកក់ច្រើនតុ ក្ដីប៉ុន្ដែលោកក៏នៅតែសប្បាយចិត្ដដែលសម្ដេចតេជោ បើកប្រទេសឡើងវិញ ពីព្រោះតែការបើកនេះគឺបានជួយជំរុញមួយផ្នែកដល់ចរន្ដសេដ្ឋកិច្ចរបស់លោកងើបឡើងវិញ ខណៈពេលមុនគ្មានចំណូលចូល។ យ៉ាងណាទន្ទឹមនិងការបើកប្រទេសលើគ្រប់វិស័យឡើងវិញនេះ លោកទទូចឲ្យគ្រប់គ្នាចូលរួមអនុវត្ដវិធានសុខាភិបាលឲ្យបានខ្ជាប់ខ្ជូនដើម្បីប្រទេសស្ថិតនៅជាធម្មតាតទៅមុខ។
សម្រាប់អ្នកតាមដានការអភិវឌ្ឍសង្គម លោក ជា ច័ន្ទបរិបូណ៍ បានថ្លែងថា ចំពោះការអាចបើកប្រទេសលើគ្រប់វិស័យឡើងវិញបាននាពេលនេះ កត្ដាចម្បងគឺយុទ្ធនាការចាក់វ៉ាក់សាំងរបស់រាជរដ្ឋាភិបាលជូនប្រជាជន ។
លោកអ្នកតាមដានការអភិវឌ្ឍសង្គម បានបន្ថែមដោយសង្កត់ធ្ងន់ថា ខណៈប្រទេសបើកឡើងវិញភាគីពាក់ព័ន្ធ រាប់ទាំងប្រជាជន និងអាជ្ញាធរ ត្រូវមានទំនួលខុសត្រូវ និងការចូលរួមឲ្យបានពេញដៃពេញជើង។ ជាក់ស្ដែងការអនុវត្ដវិធានសុខាភិបាល ៣កុំ និង ៣ការពារ ត្រូវបំពេញដោយកុំប្រហែស ហើយដើម្បីជំរុញការអនុវត្ដវិធានទាំងនេះបានល្អ គឺទាមទារការពង្រឹងអភិបាលកិច្ចដោយអាជ្ញាធរ ។
កម្ពុជាត្រូវបានប្រកាសបើកដំណើរការឡើងវិញលើគ្រប់វិស័យ ប៉ុន្ដែប្រជាជនត្រូវរៀនរស់តាមបែបគន្លងថ្មី នៅក្នុងបរិបទនៃជំងឺកូវីដ១៩។ ថ្វីបើប្រជាជនបានចាក់វ៉ាក់សាំងយ៉ាងច្រើនលើសលុបហើយក្ដី ប៉ុន្ដែវិធានសុខាភិបាល ដែលអាជ្ញាធរបានដាក់ចេញ គឺនៅតែជាកត្ដាសំខាន់ក្នុងការអនុវត្ដ ដើម្បីចៀសផុតពីចម្លងជំងឺ។ វ៉ាក់សាំងជាឧបករណ៍ការពារប្រជាជនគ្រប់រូបពីការធ្លាក់ខ្លួនឈឺធ្ងន់រហូតដល់ស្លាប់ព្រោះជំងឺកូវីដ១៩ តែមិនអាចការពារមិនឲ្យឆ្លងជំងឺនេះនោះទេ ដូច្នេះទើបរាជរដ្ឋាភិបាល នៅតែអំពាវនាវសូមកុំឲ្យប្រជាជនមានការធ្វេសប្រហែស ដោយពឹងផ្អែកលើវ៉ាក់សាំង ហើយបោះបង់វិធានសុខាភិបាល ៣កុំ ដែលមានដូចជា កុំទៅកន្លែងបិទជិត កុំប្រើម៉ាស៊ិនត្រជាក់ច្រើនពេក និងប៉ះពាល់គ្នាជិតស្និត ដោយឡែក ៣ការពារ គឺត្រូវពាក់ម៉ាស់ឲ្យបានត្រឹមត្រូវ លាងដៃជាមួយសាប៊ូ អាកុល ឬជែល និងត្រូវស្ថិតនៅឆ្ងាយពីគ្នាចាប់ពី១ម៉ែត្រកន្លះឡើងទៅ៕
