ផ្ទុះពីសង្គ្រាមគឺជាទុក្ខសោកនិងការសោកស្តាយសម្រាប់ជាតិទាំងមូល
ទន្ទឹមនឹងការអំពាវនាវឲ្យពលរដ្ឋប្រុងប្រយ័ត្នខ្ពស់ចំពោះគ្រាប់មីន គ្រាប់បែកចង្កោម និងសំណល់ជាតិផ្ទុះពីសង្គ្រាម សម្តេចតេជោ ហ៊ុន សែន នាយករដ្ឋមន្ត្រី បានចាត់ទុកការបាត់បង់ជីវិត ពិការ និងរបួសរបស់ប្រជាពលរដ្ឋក៏ដូចជាអ្នកដោះមីន ដោយសារសំណល់ជាតិផ្ទុះពីសង្គ្រាម គឺជាទុក្ខសោក និងជាការសោកស្តាយបំផុតសម្រាប់ប្រជាតិទាំងមូល។
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានលើកឡើងថា សង្គ្រាមបានបន្សល់ទុកនូវគ្រាប់មីន គ្រាប់បែកចង្កោម និងសំណល់ជាតិផ្ទុះពីសង្គ្រាមយ៉ាងច្រើនសន្ធឹកសន្ធាប់ ដែលបណ្តាលឲ្យប្រជាពលរដ្ឋរាប់ម៉ឺននាក់រងរបួស ធ្លាក់ខ្លួនពិការ និងស្លាប់បាត់បង់ជីវិត ព្រមទាំងបង្កនូវសោកនាដកម្មដ៏ឈឺចាប់ដែលមិនធ្លាប់កើតមានពីមុនមក និងរាំងស្ទះដល់ការអភិវឌ្ឍប្រទេស។
សម្តេចតេជោបន្តថា ក្រោមនយោបាយឈ្នះឈ្នះ ដែលត្រូវបានដាក់ចេញនៅចុងឆ្នាំ១៩៩៨ រាជរដ្ឋាភិបាលបានបង្រួបបង្រួមជាតិ និងមានលទ្ធភាពដោះស្រាយនូវផលអវិជ្ជមានលើគ្រប់វិស័យ។ ជាមួយគ្នានេះ វិស័យសកម្មភាពមីនបានចូលរួមចំណែកយ៉ាងសំខាន់ដល់កិច្ចគាំពារសន្តិភាពនិងការអភិវឌ្ឍសេដ្ឋកិច្ចសង្គម។ សម្តេចតេជោ បានលើកឡើងយ៉ាងដូច្នេះតាមរយៈសារលិខិតក្នុងឱកាសប្រារព្ធខួបលើកទី២៣ នៃទិវាជាតិយល់ដឹងអំពីមីន ២៤កុម្ភៈ ២០២២ ហើយដែលត្រូវបានផ្សព្វផ្សាយនៅថ្ងៃទី២៣កុម្ភៈនេះ។
សម្តេចតេជោនាយករដ្ឋមន្ត្រី បានឲ្យដឹងថា ក្នុងរយៈពេល ២៩ឆ្នាំកន្លងមកនេះ ពោលគឺចាប់ពីឆ្នាំ១៩៩២ ដល់ឆ្នាំ២០២១ ផ្ទៃដីទំហំ ២៣២៥គីឡូម៉ែត្រក្រឡា ត្រូវបានបោសសម្អាតសម្រាប់យកទៅប្រើប្រាស់ និងបង្កបង្កើនផល ក្នុងវិស័យកសិកម្ម ៧១% ហេដ្ឋារចនាសម្ព័ន្ធ ៨% និងផ្សេងៗ ២១% រួមមានការសាងសង់លំនៅដ្ឋាន ភូមិករ សាលារៀន មណ្ឌលសុខភាពជាដើម ដោយមានប្រជាពលរដ្ឋទទួលផលចំនួន ជិត ៨លាននាក់។ ក្នុងរយៈពេល ២៩ឆ្នាំកន្លងមកនេះ មីនប្រឆាំងមនុស្សចំនួនជិត ១លាន២សែនគ្រាប់ មីនប្រឆាំងរថក្រោះចំនួនជាង ២៥ម៉ឺនគ្រាប់ និងសំណល់ជាតិផ្ទុះពីសង្គ្រាមរាប់បញ្ចូលទាំងគ្រាប់បែកចង្កោមចំនួនជិត ៣លានគ្រាប់ ត្រូវបានរកឃើញ និងបំផ្លាញចោល។
សម្តេចតេជោ ហ៊ុន សែន បញ្ជាក់ថា ក្នុងនាមជាប្រទេសស្រឡាញ់សុខសន្តិភាព រាជរដ្ឋាភិបាលកម្ពុជាក៏តែងតែយកចិត្តទុក និងគិតគូរ ព្រមទាំងបានរួមចំណែកយ៉ាសកម្ម ក្នុងការជួយសម្រាលទុក្ខលំបាករបស់បណ្តាប្រទេសដែលរងផលប៉ះពាល់ដូចគ្នា តាមរយៈការបញ្ជូនកងកម្លាំងរក្សាសន្តិភាពចូលរួមបំពេញបេសកកម្មក្នុងក្របខ័ណ្ឌប្រតិបត្តិការរក្សាសន្តិភាពរបស់អង្គការសហប្រជាជាតិ ក្នុងប្រទេសចំនួន៩ រួមមាន ប្រទេសស៊ូដង់ ស៊ូដង់ខាងត្បូង លីបង់ ស៊ីប ស៊ីរី យេម៉ែន ឆាដ ម៉ាលី និងអាហ្វ្រិកកណ្តាល សរុបចំនួន ៧៨៩៩នាក់ ក្នុងនោះស្រីចំនួន ៥២៨នាក់។
ជាមួយគ្នានេះ សម្តេចតេជោ បានអំពាវនាវដល់ក្រសួងស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទប្រតិបត្តិករជាតិនិងអន្តរជាតិ ត្រូវចូលរួមឲ្យបានខ្លាំងក្លាថែមទៀត ក្នុងការផ្សព្វផ្សាយការយល់ដឹងពីគ្រោះថ្នាក់ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាមដល់ប្រជាពលរដ្ឋសិស្សានុសិស្ស កុមារា កុមារី និងយុវជនក្រៅសាលានៅតាមសហគមន៍ដែលរងផលប៉ះពាល់ តាមរយៈសកម្មភាពអប់រំដោយផ្ទាល់នៅតាមសហគមន៍ សាលារៀន និងវត្តអារាម ការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ការអនុវត្តច្បាប់ស្តីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ កម្មវិធីសិក្សារបស់ក្រសួងអប់រំ យុវជន និងកីឡា និងការផ្សព្វផ្សាយទូលំទូលាយតាមវិទ្យុ ទូរទស្សន៍ បណ្តាញសង្គម ផ្ទាំងប៉ាណូ និងខិត្តបណ្ណ៕
