ភ្នំពេញ ៖ តើអ្វីទៅជាការបំបែកប្លង់ក្បាលដីក្នុងវិស័យអចលនទ្រព្យ? ការបំបែកប្លង់ក្បាលដី គឺជាដំណើរការនៃការបែងចែកដីធំទៅជាដីតូចៗជាច្រើនសម្រាប់លក់ ឬសម្រាប់គោល បំណងអភិវឌ្ឍន៍ផ្សេងៗ ដូចជាដីគម្រោងដីឡូតិ៍ ឬគម្រោងបុរីជាដើម។ គម្រោងទាំងពីរនេះមានការពេញនិយមយ៉ាងខ្លាំង ហើយវាជាអាជីវកម្មដែលរកចំណូលបានច្រើននៅក្នុងប្រទេសកម្ពុជា។
ប៉ុន្តែ តើហេតុអ្វីបានជាអ្នកត្រូវបំបែកប្លង់ក្បាលដី? ក្នុងនាមជាអ្នកទិញដីឡូត៍ ឬគម្រោងលំនៅដ្ឋាន អ្នកនឹងទទួលបានប័ណ្ណកម្មសិទ្ធិបំបែកក្បាលដីពីអ្នកអភិវឌ្ឍន៍ បន្ទាប់ពីអ្នកទិញដី ឬផ្ទះនៅក្នុងគម្រោងណាមួយ។ ដូច្នេះ អ្នកចាំបាច់ត្រូវចុះ ឈ្មោះបំបែកប្លង់ក្បាលដីនៅការិយាល័យសុរិយោដី ដើម្បីទទួលបានកម្មសិទ្ធិ ពេញលេញលើអចលនទ្រព្យ ក្រោមឈ្មោះរបស់អ្នក។
ការបំបែកប្លង់ក្បាលដីចែកចេញជាពីរទម្រង់៖ ទីមួយ ការបំបែកប្លង់ក្បាលដី ជាមួយការផ្ទេរកម្មសិទ្ធិ និងទីពីរ ការបំបែកដោយ គ្មានការផ្ទេរកម្មសិទ្ធិ។ ការបំបែកប្លង់ក្បាលដី ជាមួយការផ្ទេរកម្មសិទ្ធិ សំដៅលើការផ្ទេរកម្មសិទ្ធិដីធ្លី ទៅឱ្យម្ចាស់ផ្សេងទៀតតាមរយៈការទិញ មរតក អំណោយ ការផ្លាស់ប្តូរ ឬដីកាតុលាការ។
ចំណែក ការបំបែកប្លង់ក្បាលដីដោយគ្មានការផ្ទេរកម្មសិទ្ធិត្រូវបានធ្វើឡើងសម្រាប់តែគោលបំណងពាណិជ្ជកម្ម (លក់) ប៉ុណ្ណោះ ដោយមិនមានការផ្ទេរ កម្មសិទ្ធិទៅឱ្យម្ចាស់ ផ្សេងទៀត (អ្នកទិញ) បានភ្លាមៗនោះទេ។ ជាទូទៅ អ្នកអភិវឌ្ឍន៍ដីឡូ ឬបុរីនឹងផ្តល់ប្លង់បំបែកក្បាលដី ប្រភេទនេះជូនដល់អតិថិជនរបស់ខ្លួន លុះត្រាតែគម្រោងនោះ បានលក់ចប់សព្វគ្រប់ ហើយការផ្ទេរប្លង់នឹងធ្វើ ឡើងតាមប្លង់ដីនីមួយៗ ដាច់ដោយឡែកពីគ្នា។
ទោះជាយ៉ាងណា បទប្បញ្ញត្តិថ្មីស្តីពីការអភិវឌ្ឍន៍ដីធ្លី ចេញដោយក្រសួងរៀបចំដែនដី នគរូបនីយកម្ម និងសំណង់ (MLMUPC) បានចែងថា ចាប់ពីឆ្នាំ ២០២២ តទៅ អ្នកអភិវឌ្ឍន៍បុរី និងអគាសហកម្មសិទ្ធិទាំងអស់ ត្រូវចុះបញ្ជីបំបែកប្លង់ក្បាលដីជាមុនសិន ទើបពួកគេមានសិទ្ធិលក់ គម្រោងណាមួយ។
គោលដៅចម្បងនៃការបង្កើតច្បាប់ថ្មីនេះ គឺដើម្បីបង្កើនតម្លាភាព ក្នុងប្រតិបត្តិការលក់ អចលនទ្រព្យនៅលើទីផ្សារ និងកាត់បន្ថយ ជម្លោះរវាងម្ចាស់គម្រោង និងអ្នកទិញអចលនទ្រព្យ។ ក្នុងរយៈពេល៥ទៅ១០ឆ្នាំកន្លងមកនេះ គេសង្កេតឃើញមាន វិវាទជាច្រើនទាក់ទងនឹងការបំបែកប្លង់កម្មសិទ្ធិ និងតម្លាភាពនៃការលក់ អចលន្រព្យនៅក្នុងប្រទេសកម្ពុជា។
តាមដានព័ត៌មានផ្សេងៗទាក់ទង នឹងការអភិវឌ្ឍន៍ ជាពិសេស វិស័យអចលនទ្រព្យ សូមចូលទៅកាន់គេហទំព័រ Harbor property និងកម្មវិធីទូរសព្ទដៃដោយសរី៕
