ខេត្តបាត់ដំបង៖ ប៉ូលិសខេត្តបាត់បង បានប្រកាសនៅថ្ងៃអាទិត្យ ទី២៦ ខែមិថុនានេះថា ម្ចាស់គណនី ហ្វេសប៊ុកឈ្មោះ An Nich ដែលបានផ្សព្វផ្សាយលក់ផលិតផលបារីអេឡិចត្រូនិក អេចឈ៍ ធី ភី (HTPs)ត្រូវបានប៉ូលិស ហៅមកសាកសួរ និងធ្វើកិច្ចសន្យា ព្រមទាំងដកហូតបារីអេឡិចត្រូនិក និងទឹកថ្នាំ មុននឹងអនុញ្ញាតឱ្យវិលត្រឡប់ទៅវផ្ទះវិញ។
ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្តបាត់ដំបង បានប្រកាសថា នៅក្នុងរយៈពេលប៉ុន្មានថ្ងៃ កន្លងទៅនេះ បានកត់សម្គាល់ឃើញថា ម្ចាស់គណនីហ្វេសប៊ុកឈ្មោះ An Nich បានបង្ហោះខ្លឹមសារ និងរូបភាពពីការផ្សព្វផ្សាយលក់ផលិតផលបារីអេឡិចត្រូនិកអេចឈ៍ ធី ភី(HTPs) ដែលបញ្ហានេះ បានធ្វើឱ្យមហាជនទូទៅ ពិសេសអ្នកនិយមប្រើប្រាស់បណ្តាញសង្គម លើកឡើងនូវមតិយោបល់រិះគន់ចំពោះសកម្មភាពខាងលើ ថាបាននាំពង្វក់ដល់ស្មារតីរបស់យុវជន។
ស្នងការដ្ឋាននគរបាលខេត្តបាត់ដំបង លើកឡើងថា នៅថ្ងៃទី២៦ ខែមិថុនា ឆ្នាំ២០២២ សមត្ថកិច្ចនគរបាលផែនការងារប្រឆាំងគ្រឿងញៀន បានស្វែងរកឃើញម្ចាស់គណនីខាងលើ ហើយបាននាំមកធ្វើការសាកសួរបំភ្លឺ ចំពោះការផ្សព្វផ្សាយលក់បារីអេឡិចត្រូនិក នៅក្នុងគណនីហ្វេសប៊ុករបស់ខ្លួនកន្លងមក។ ក្នុងនោះ សមត្ថកិច្ច បានរកឃើញ៖ -ក្បាលបឺតបារីអេឡិចត្រូនិក (Vab) ចំនួន ០៤ដើម (០២ប្រអប់) និងទឹកសម្រាប់បញ្ចូល ទៅក្នុងបារីអេឡិចត្រូនិក (ទឹកVab) ចំនួន ០៤ដប។
សេចក្តីប្រកាស បន្តថា ក្រោយបញ្ចប់ការសាកសួរ និងស្របតាមអនុសាសន៍របស់ឯកឧត្តម កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង សមត្ថកិច្ចនគរបាល បានធ្វើកិច្ចសន្យា ជាមួយម្ចាស់គណនីខាងលើ ដោយឱ្យគាត់បញ្ឈប់នូវសកម្មភាពដូចពេលកន្លងមក (ដោយដករក្សាទុកសម្ភារៈខាងលើ) រួចអនុញ្ញាតឱ្យគាត់វិលទៅលំនៅដ្ឋានវិញ ត្បិតករណីនេះ មិនទាន់មានអំពើល្មើសច្បាប់ព្រហ្មទណ្ឌ ដែលនាំទៅដល់ការអនុវត្តទោសបាននៅឡើយទេ។
ទោះបីជាបែបនេះក្តី ក្នុងនាមសមត្ថកិច្ចនគរបាលនៃស្នងការដ្ឋាននគរបាលខេត្តបាត់ដំបង សូមថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តនិងការចូលរួមសហការផ្តល់ព័ត៌មាន មកសមត្ថកិច្ចនគរបាល ដែលមតិយោបល់ ឬព័ត៌មាន ដែលមហាជន បានផ្តល់ជូនមកនោះ សមត្ថកិច្ចនគរបាលពុំបានព្រងើយកន្តេីយ ឬមិនយកចិត្តទុកដាក់អនុវត្តនោះទេ។
ជាមួយនេះក៏ ស្នងការដ្ឋាននគរបាលខេត្តបាត់ដំបង បានប្រកាស អំពាវនាវដល់ប្រជាពលរដ្ឋ ជាពិសេសប្អូនៗ ជាយុវវ័យ សូមកុំប្រើប្រាស់នូវប្រភេទបារីអេឡិចត្រូនិកទាំងនេះ ព្រោះវាបានបង្កឱ្យប៉ះពាល់ដល់សុខភាពធ្ងន់ធ្ងរ ឬរហូតបាត់បង់ជីវិតទៀតផង៕
