រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសវ័យចំណាស់ម្នាក់មកពីធ្វើការផឹកស្រាស្រវឹង ក៏កើតចិត្តខឹងជាមួយនឹងប្រពន្ធដែលធ្វើម្ហូបយឺត ក៏យកខ្សែក្រវាត់វា.យប្រពន្ធខ្លួនដែលអាយុក្មេងជាង បណ្ដាលឲ្យរងរបួសធ្ងន់បែកក្បាល និងប៉ោងភ្នែកម្ខាង បង្កឱ្យមានការភ្ញាក់ផ្អើលកាលពីវេលាម៉ោង៦និង៤៥នាទីយប់ ថ្ងៃទី១២ ខែតុលា ឆ្នាំ២០២២ ស្ថិតនៅក្នុងភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ ។
សេចក្តីរាយការណ៍បន្តថា ជនរងគ្រោះខាងលើមានឈ្មោះ យឹម យ៉ោម ភេទស្រី អាយុ៤១ឆ្នាំ មុខរបរសន្តិសុខយាមតាមរោងចក្រ សា្នក់នៅភូមិកើតហេតុខាងលើ មានស្រុកកំណើតនៅភូមិបឹងធំ ឃុំអង្គសុភី ស្រុកកំពងត្រាច ខេត្តកំពត។ ចំណែកប្ដីនាបឈ្មោះ កូវ សារិន អាយុ៥៦ឆ្នាំ មុខរបរកម្មករសំណង់ ស្នាក់នៅភូមិកើតហេតុខាងលើ មានស្រុកកំណើតនៅខេត្តព្រៃវែង។
តាមប្រភពព័ត៌មានបញ្ជាក់ពីប្រពន្ធរងគ្រោះបានអោយដឹងថា នៅពេលកើតហេតុ ដោយសារប្ដីរបស់គាត់ចេញពីធ្វើការសំណង់មកដល់បន្ទប់ជួលវិញ ក៏ទិញស្រាយកមកផឹក លុះពេលផឹកស្រវឹងស្រឿងៗក៏បានថាអោយគាត់ធ្វើម្ហូបយឺត ក្របានហូបពេក បន្ទាប់មកក៏ជជែកគ្នាតឹងសរសៃ.ករហូតរាលដាលធ្លាក់ដល់រឿងលុយ។
ប្រភពដដែលបន្តថា គ្រានោះប្ដីរបស់គាត់បានសួរនាំរឿងលុយកាក់អស់ទៅណា ទើបតែបើកមកថ្មីៗសោះ ប្រពន្ធក៏បានឆ្លើយវិញថា ខ្ញុំយកទៅបង់ថ្លៃបន្ទប់ជួលអស់ ហើយស្រាប់តែពេលនោះ ប្ដីខឹងខ្លាំងក៏បានយកខ្សែក្រវាត់ពីរផ្គុំគ្នា រួចវា.យទៅលើក្បាលប្រពន្ធ បណ្ដាលឲ្យបែកក្បាលហូរឈា.ម និងប៉ោងភ្នែកម្ខាង រហូតដល់សន្លប់ស្ដូកស្ដឹងតែម្តង ហើយក៏ត្រូវបានប្រជាពលរដ្ឋនៅផ្ទះជួលជិតខាង ឃើញដូច្នេះបាននាំគ្នាទាក់ទងប្ដឹងទៅសមត្ថកិច្ចមូលដ្ឋាន លុះបន្ទាប់មកសមត្ថកិច្ចបានចុះទៅដល់ ហើយក៏បានឃាត់ខ្លួនប្ដីរូបនោះយកទៅសួរនាំនៅប៉ុស្តិ៍ ចំណែកប្រពន្ធវិញត្រូវបានខាងសង្គ្រោះ៧១១ ដឹកយកទៅសង្គ្រោះបន្ទាន់ភ្លាមៗនៅមន្ទីរពេទ្យព្រះកុសមៈ។
ក្រោយពេលកើតហេតុ បន្ទាប់ពីសមត្ថកិច្ចមូលដ្ឋានបានទាក់ទងសួរនាំទៅខាងជនរងគ្រោះនៅឯមន្ទីរពេទ្យព្រះកុសមៈ ជនរងគ្រោះបានឆ្លើយថា ប្ដឹងយកគាត់ (បុរសជាប្តី) ទៅដាក់ពន្ធនាគារ បន្ទាប់មកសមត្ថកិច្ចក៏បានកសាងសំណុំរឿងបញ្ជូនប្ដីចិត្តខ្លាំងរូបនេះទៅផ្នែកជំនាញព្រហ្មទណ្ឌ ដើម្បីចាត់ការទៅតាមនីតិវិធីបន្ត៕
