ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានដាស់តឿនក្រឿនរំលឹកទៅដល់គណបក្សប្រឆាំង ត្រូវបញ្ចប់វប្បធម៌ជេរប្រមាថ វាយប្រហារ លាបពណ៌មកលើគណបក្សប្រជាជនកម្ពុជា បើមិនចង់មានបញ្ហាផ្លូវច្បាប់។ ការដាស់តឿននេះ បានធ្វើឡើងក្នុងពិធីបើកការដ្ឋានសាងសង់ពង្រីក និងលើកកម្រិតគុណភាពកំណាត់ផ្លូវជាតិលេខ៧ ចាប់ពីរង្វង់មូលស្គន់ ទីរួមស្រុកជើងព្រៃ រហូតដល់ទីរួមខេត្តកំពង់ចាម នាព្រឹកថ្ងៃទី៩ ខែមករា ឆ្នាំ២០២៣។
ជាសារក្រឿនរំលឹកជាថ្មីទៀត សម្តេចតេជោ ហ៊ុន សែន នាយករដ្ឋមន្ត្រី បានដាស់តឿនទៅដល់គណបក្សប្រឆាំងឲ្យបញ្ឈប់វប្បធម៌ជេរប្រមាថ វាយប្រហារ លាបពណ៌មកលើគណបក្សប្រជាជនកម្ពុជា ដែលទទួលបានសម្លេងគាំទ្រពីប្រជាពលរដ្ឋដ៏លើសលប់ និងបានដឹកនាំប្រទេសអស់រយៈកាលជាង ៤៤ឆ្នាំកន្លងមកនេះ។ ការផ្ញើសារនេះ បន្ទាប់ពីក្នុងវេទិការបស់គណបក្សប្រឆាំងកន្លងមក និងពេលថ្មីៗនេះ តែងបានបើកការវាយប្រហារធ្ងន់ៗមកលើគណបក្សប្រជាជនកម្ពុជា ដែលសម្តេចតេជោ ក្នុងនាមប្រធានគណបក្សមិនអាចនៅស្ងៀមបាន។
សម្តេចបានចោទសួរទៅក្រុមប្រឆាំងថា បើគ្រាន់តែដើម្បីស្វែងរកការគាំទ្រពីប្រជាជន តើចាំបាច់អីត្រូវបើកការវាយប្រហារមកលើគណបក្សប្រជាជនកម្ពុជា ឬក៏អ្នកទាំងអស់នោះចង់យកគណបក្សប្រជាជនកម្ពុជា ជារបស់ប្រជាជនធ្វើជាសត្រូវឬយ៉ាងណា? ទន្ទឹមគ្នានេះ សម្តេចតេជោបានណែនាំទៅក្រុមប្រឆាំងថា បើចង់ឈ្នះឆ្នោតគ្រាន់តែឃោសនាអំពីនយោបាយខ្លួនទៅបានហើយ។
ជាមួយគ្នានេះ សម្ដេចតេជោ ហ៊ុន សែន ក៏បានព្រមានទៅក្រុមប្រឆាំងថា ត្រូវតែបញ្ចប់វប្បធម៌ឡាំប៉ា ចោទប្រកាន់មកលើគណបក្សប្រជាជនកម្ពុជា ក្រោយពេលដែលខ្លួនចាញ់ឆ្នោតម្តងៗ។ សម្ដេចតេជោបញ្ជាក់ថា បើសិននៅតែចោទប្រកាន់វាយប្រហារគណបក្សប្រជាជនកម្ពុជានៅក្នុងការឃោសនារបស់ខ្លួននោះ គណបក្សប្រជាជនកម្ពុជាមិនអាចទទួលយកការចោទប្រកាន់នានាបានទេ គឺត្រូវតែប្តឹងទៅតាមច្បាប់ ប្រសិនជាការចាំបាច់។
សម្ដេចតេជោ ហ៊ុន សែន ក៏បានបញ្ជាឲ្យមេធាវីរបស់គណបក្សប្រជាជនកម្ពុជាទាំងអស់នៅទូទាំងប្រទេស ត្រៀមឯកសារ និងភ័ស្តុតាងដើម្បីប្តឹងតាមច្បាប់ចំពោះរាល់ការចោទប្រកាន់ និងប្រមាថមើលងាយមកលើគណបក្សប្រជាជនកម្ពុជា។
គួរបញ្ជាក់ថា ពាក់ព័ន្ធនឹងការជេរប្រមាថ វាយប្រហារ លាបពណ៌មកលើគណបក្សប្រជាជនកម្ពុជានេះ កន្លងមកគណបក្សប្រជាជនកម្ពុជា បានសម្រេចប្តឹងលោក សុន ឆ័យ អនុប្រធានគណបក្សភ្លើងទៀន ពាក់ព័ន្ធការចោទ និងបំភ្លៃជុំវិញដំណើរការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៥ ដោយស្នើសុំឲ្យផ្តន្ទាទោសតាមច្បាប់ និងទាមទារសំណងជំងឺចិត្ត ៤ពាន់លានរៀល ឬស្មើនឹង ១លានដុល្លារអាមេរិក។
ក្នុងពាក្យបណ្តឹងដាក់ចូលទៅអយ្យការអមសាលាដំបូងរាជធានីភ្នំពេញ កាលពីថ្ងៃទី១៤ ខែមិថុនា ឆ្នាំ២០២២ លោក គី តិច មេធាវីតំណាងឱ្យគណបក្សប្រជាជនកម្ពុជា បានគូសរំលេចនូវពាក្យសម្តីមួយចំនួនរបស់លោក សុន ឆ័យ ក្នុងបទសម្ភាសន៍ជាមួយបណ្តាញព័ត៌មានមួយចំនួន។ សម្តីក្នុងបទសម្ភាសន៍ទាំងនោះ ត្រូវបានលោកមេធាវី គី តិច ចាត់ទុកថា ជាអំពើទុច្ចរិត, បំភ្លៃខុសពីការពិត, ជាការផ្តល់ព័ត៌មានក្លែងក្លែង ក្នុងចេតនាទម្លាក់កំហុសដោយអសុទ្ធចិត្ត និងមូលបង្កាច់នាំឱ្យប៉ះពាល់យ៉ាងធ្ងន់ធ្ងរធ្ងរ ដល់កិត្តិយសរបស់គណបក្សប្រជាជនកម្ពុជា ដែលជាគណបក្សឈ្នះឆ្នោត៕
