ហ្វេសប៊ុក ៖ មានការចែករំលែកតៗគ្នាជាច្រើន នៅក្នុងបណ្តាញសង្គមហ្វេសប៊ុក ទាក់ទងនឹងវីដេអូ ចំនួន២ឃ្លីប ដែលបង្ហាញពីសកម្មភាពបុរសម្នាក់ បើកបររថយន្តដូចខាងលើ បានបើកបរវ៉ាជែងចូលគន្លងផ្លូវម្ខាងទៀត ខណៈពេលផ្លូវកំពុងមានកកស្ទះ ហើយរថយន្តដែលបើកបរទល់មុខរថយន្ត Lexus RX 330 បានបង្ហាញអារម្មណ៍ខឹងសម្បារជាខ្លាំង នឹងការបើកបរគ្មានដឹងច្បាប់ទម្លាប់របស់ម្ចាស់រថយន្ត ឡិចស៊ីស RX 330 ជាហេតុធ្វើឲ្យអ្នកបើកបររថយន្តទាំងពីរ កើតមានជម្លោះពាក្យសម្ដីនឹងគ្នា ឈានដល់ម្ចាស់រថយន្តឡិចស៊ីស RX 330 ចុះពីរថយន្តទៅវាយអ្នកបើកបររថយន្តម្នាក់ទៀត ថែមទៀត ។
រឿងរ៉ាវហួសចិត្តថ្មីមួយទៀត បានបង្ហាញពីសកម្មភាពរបស់អ្នកបើកបររថយន្ត ឡិចស៊ីស RX 330 ពណ៌ស ពាក់ស្លាកលេខ ភ្នំពេញ 2BG-1171 ដែលបានបើកចូលគន្លងផ្លូវអ្នកដទៃហើយ ថែមទាំងខឹងច្រឡោតចុះពីរថយន្តវាយគេបន្ថែមទៀត ពិតជាខ្លាំងមែន ។
វីដេអូដែលបង្ហោះដោយបុរសឈ្មោះ Vuthy Eav បានសរសេរថា «បងប្អូនជួយពិចារណាឡាន 330 ស្លាកលេខភ្នំពេញ 2BG 1171 ជិះចូលគំនូសរកវាយខ្ញុំទៀត» ។
តាមរយៈកាមេរ៉ាសុវត្ថិភាពក្នុងរថយន្តបានបង្ហាញថា ហេតុការណ៍នោះបានកើតឡើងកាលពីវេលាម៉ោង ០៦ និង ៤៣នាទី ថ្ងៃទី០៤ ខែធ្នូ ឆ្នាំ២០២១ ចំពោះទីតាំងកើតហេតុម្ចាស់រថយន្តមិនបានបញ្ជាក់ឡើយ ។
