ខេត្តឧត្តរមានជ័យ ៖ នៅថ្ងៃទី២៨ ខែកក្កដា ឆ្នាំ២០២២ លោក ផុន ចាន់និល អភិបាលរងក្រុងសំរោង បានចេញលិខិតជូនដំណឹងដល់បុគ្គល ០២រូប ជាម្ចាស់កាន់កាប់អចលនវត្ថុ ដែលមានដីឡូត៍សងខាងផ្លូវ ដែលបានធ្វើរបងថ្ម និងរាយបន្លាលួសបិទផ្លូវសាធារណៈ កាលពីដើមសប្តាហ៍នេះ ស្ថិតនៅភូមិដើមជ្រៃ សង្កាត់អូរស្មាច់ ក្នុងក្រុងសំរោង ធ្វើការរុះរើចេញវិញ បើកផ្លូវឡើងវិញ ។
ការជូនដណឹងនេះ បន្ទាប់បុគ្គល ២រូប គឺឈ្មោះ ឡុង សុងពីវ និងឈ្មោះ ស៊ាប រ៉ានី ជាម្ចាស់អចលនទ្រព្យ កាន់កាប់ដីឡូត៏សងខាងផ្លូវ បានរួមគ្នាធ្វើការបិទផ្លូវ ដែលជាហេតុធ្វើឲ្យមានប្រតិកម្មយ៉ាងខ្លាំង ពីគ្រប់មជ្ឈដ្ឋាន ពិសេសគឺប្រជាពលរដ្ឋក្នុងតំបន់ដែលពួកគាត់ ធ្លាប់ធ្វើចរាចរណ៍លើដងផ្លូវនេះកន្លងមក ។
អាជ្ញាធរបញ្ជាក់ដល់បុគ្គលទាំង២រូប ដែលបានបិទផ្លូវខាងលើ ឲ្យធ្វើការអនុវត្តន៍រុះរើរបងនៅលើដងផ្លូវ ជាបន្ទាន់ ក្នុងរយៈពេល យ៉ាងយូរ៧ថ្ងៃ(ប្រាំពីរថ្ងៃ) ដើម្បីសម្រួលដល់ការធ្វើចរាចរណ៍ សាធារណៈ ជាប្រក្រតីឡើងវិញ ។ ករណីលោក លោកស្រី មិនព្រមសហការ ក្នុងការរុះរើ បើកផ្លូវនេះឡើងវិញនោះទេ អាជ្ញាធរមានសមត្ថកិច្ច នឹងអនុវត្តន៍វិធានការ និងទៅតាមច្បាប់ជាធរមាន ។
ប្រជាពលរដ្ឋម្នាក់ឈ្មោះ សេង ហោ រស់នៅសង្កាត់អូរស្មាច់ បានអះអាងឲ្យដឹងថា កំណាត់ផ្លូវ ដែលត្រូវបានបិទនេះ កាលពីជាង ១៥ឆ្នាំមុន ជាផ្លូវថ្មើជើង ឬអាចបើកគោយន្តកន្ត្រៃបាន ហើយម្ចាស់ដីសងខាងផ្លូវ ឈ្មោះ ឡុង សុងពីវ និងឈ្មោះ ស៊ាប រ៉ានី បានសម្បទានដី ម្នាក់ម្ខាងៗ ចំនួន០៣ម៉ែត្រ ដើម្បីពង្រីកផ្លូវឲ្យធំទូលាយ ។ លុះឆ្នាំបន្ទាប់ៗមក ផ្លូវនេះ ត្រូវបានអាជ្ញាធរបានធ្វើការអភិវឌ្ឍចាក់ដីក្រួសក្រហម ។ លុះតម្លៃដីនៅតំបន់នោះកាន់តែឡើងខ្ពស់ ភាគីម្ចាស់ដីទាំង២នាក់ ដែលបានផ្តល់សម្រាប់ធ្វើផ្លូវនោះ បានប្រែក្រឡះយកដីម្ខាង ៣ម៉ែត្រនោះមកធ្វើជាកម្មសិទ្ធិរបស់ខ្លួនវិញ ។
សូមរម្លឹកថា កាលពីព្រឹកថ្ងៃទី២៦កក្កដាឆ្នាំ២០២២ ប្រជាពលរដ្ឋជាង ១០០គ្រួសារ នៅក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ ស្នើឲ្យអាជ្ញាធរសង្កាត់អូរស្មាច់ ជួយអន្តរាគមន៍បើកផ្លូវឡើងវិញ ខណៈមានបុគ្គល ២រូប ធ្វើរបងបិទផ្លូវ កាលពីសប្តាហ៍មុន នៅចំណុចភូមិរួតប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ ។
ពាក់ព័ន្ធទៅនឹងករណីខាងលើនេះ កន្លងមកពលរដ្ឋបាននាំគ្នាមកតវ៉ា សុំឲ្យជួយអន្តរាគមន៍បើកផ្លូវនេះឡើងវិញម្តងរួចមកហើយ នៅសង្កាត់អូរស្មាច់ ប៉ុន្តែលោក អ៊ុក ប៊ុនហេង ដែលជាចៅសង្កាត់អូរស្មាច់ បានប្រាប់ថា លោកមិនមានសិទ្ធិដោះស្រាយជូនទេ លោក នឹងបញ្ជូនរឿងនេះ ទៅដោះស្រាយបន្តនៅឯសាលាក្រុងសំរោង ៕
