កំពត: អភិបាលខេត្តកំពតបានអំពាវនាវចំពោះកម្មករ និយោជិតថា ប្រទេសជាតិពោរពេញដោយសន្តិភាព និងមានការគោរពច្បាប់ទម្លាប់ត្រឹមត្រូវទើបវិនិយោគិនជិតឆ្ងាយជឿជាក់ក្នុងការបណ្តាក់ទុន។ ប្រជាពលរដ្ឋ ពិសេសកម្មករ និយោជិតមានសីលធម៌រស់នៅល្អ ចេះគោរព និងឱ្យតម្លៃការងារនោះអ្នកវិនិយោគនឹងតម្រង់ឆ្ពោះមកចាប់ដៃរកស៊ីកាន់តែច្រើន។
ថ្លែងនាព្រឹកថ្ងៃទី១២ ខែកញ្ញា ឆ្នាំ២០២២ ក្នុងពិធីសំណេះជាមួយកម្មកររោងចក្រខេមបូថៃហ្វ៊ុតវែរស្ថិតនៅសង្កាត់អណ្តូងខ្មែរ ក្រុងកំពត ឯកឧត្តម ម៉ៅ ធនិន អភិបាលខេត្តកំពតបានមានប្រសាសន៍ថាដោយសារប្រទេសជាតិមានសន្តិភាពទើបអ្នកវិនិយោគជាច្រើននាំគ្នាមកកម្ពុជាដើម្បីបណ្តាក់ទុនរកស៊ី។ សម្រាប់ខេត្តកំពតមានរោងចក្រចំនួន៨ និងបានផ្តល់ការងារជូនកម្មករ កម្មការិនីរាប់ម៉ឺននាក់ក្នុងការរកប្រាក់ចំណូលប្រចាំខែ។ ដូច្នេះមេក្រុម មេផ្នែករោងចក្រត្រូវស្រឡាញ់ និងជួយមើលថែគ្នាដោយបញ្ចៀសឲ្យបាននូវការគាបសង្កត់ក្នុងករណីណាមួយ។
ឯកឧត្តមអភិបាលខេត្តបានអំពាវនាវថាកម្មករ និយោជិតរោងចក្រទាំងអស់សូមធ្វើជាគំរូល្អដោយផ្តើមចេញពីកូនល្អ ពលរដ្ឋល្អ និងបុគ្គលិកល្អ គឺចេះគោរពច្បាប់ និងពេលម៉ោងធ្វើការដើម្បីទាក់ទាញអ្នកវិនិយោគឱ្យតម្រង់ឆ្ពោះមកខេត្តកំពតកាន់តែច្រើនថែមទៀត។
សូមបញ្ជាក់ថាក្នុងពិធីសំណេះសំណាលនេះ ឯកឧត្តម ម៉ៅ ធនិន អភិបាលខេត្ត និងលោកជឹង ផល្លា ប្រធានក្រុមប្រឹក្សាខេត្តកំពតបាននាំយកនូវអំណោយលើកទឹកចិត្តមួយចំនួនជូនដល់កម្មករ កម្មការិនីសម្រាប់ឱកាសបុណ្យភ្ជុំបិណ្ឌតាមរយៈការចាប់ឆ្នោតផ្សងសំណាងផងដែរ៕
