(ពោធិ៍សាត់)៖ នារសៀលថ្ងៃទី២០ ខែតុលា ឆ្នាំ២០២១នេះ នៅវេទិកាក្នុងសាលាខេត្ត ឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ និងជាប្រធានគណៈកម្មការខេត្ត ប្រយុទ្ធប្រឆាំងជំងឺកូវីដ១៩ ដោយមានការចូលរួមពីថ្នាក់ដឹកនាំខេត្តមួយចំនួន បានទទួលអំណោយសប្បុរសធម៌ ជាអង្ករចំនួន១០តោន ពីស្ថាប័នស្នងការដ្ឋាននគរបាលខេត្តពោធិ៍សាត់ ដើម្បីទុកចែកជូនប្រជាពលរដ្ឋក្រីក្រខ្វះខាត ក្នុងអំឡុងនៃការរីករាលដាលជំងឺកូវីដ១៩។
មានប្រសាសន៍ក្នុងឱកាសនោះឯកឧត្តម ជាវ តាយ បានលើកបញ្ជាក់ថា បញ្ហាការឆ្លងរីករាលដាលជំងឺកូវីដ១៩ គឺជាបញ្ហាសកល ដែលធ្វើឱ្យប៉ះពាល់ដល់សុខភាពអាយុជីវិតប្រជាជន និងសេដ្ឋកិច្ចសង្គមយ៉ាងធ្ងន់ធ្ងរ។ បច្ចុប្បន្ននៅតាមបណ្ដាប្រទេសក្នុងពិភពលោក បាននឹងកំពុងយកចិត្តទុកដាក់យ៉ាងខ្លាំង ក្នុងការប្រយុទ្ធប្រឆាំងនិងបង្ការទប់ស្កាត់ ជំងឺដ៏កាចសាហាវនេះ។
សម្រាប់កម្ពុជាយើង ប្រមុខរាជរដ្ឋាភិបាល ដែលមានសម្ដេចតេជោ ហ៊ុនសែន ជាប្រមុខដឹកនាំ សម្តេចតែងតែបានយកចិត្តទុកដាក់ ជំរុញដាក់ចេញនូវវិធានការនានា ដើម្បីអនុវត្តន៍ ក្នុងការបង្ការទប់ស្កាត់ជំងឺនេះ ពិសេសការជម្រុញចាក់វ៉ាក់សាំងជូនប្រជាជន តាមគោលការណ៍ស្ម័គ្រចិត្ត មិនបង់ថ្លៃ និងមិនរើសអើង សំដៅផ្ដល់ភាពសាំក្នុងសហគមន៍ ដើម្បីដំណើរការបើកប្រទេស និងជំរុញការស្ដារ និងអភិវឌ្ឍសេដ្ឋកិច្ចលើគ្រប់វិស័យឡើងវិញ។
ក្នុងនាមរដ្ឋបាលខេត្ត ឯកឧត្តមក៏បានថ្លែងអំណរគុណ និងកោតសរសើរចំពោះស្ថាប័នស្នងការដ្ឋាននគរបាលខេត្ត ដែលជាម្ចាស់អំណោយ និងបានចាត់ទុកអំណោយទាំងអស់នេះ ពិតជាសំខាន់ក្នុងស្មារតី និងកាយវិការមនុស្សធម៌ដ៏ប្រពៃ ដើម្បីរួចចំណែកជាមួយរដ្ឋបាលខេត្តពោធិ៍សាត់ ដែលកំពុងមានតម្រូវការចាំបាច់ សម្រាប់ជួយដល់ប្រជាពលរដ្ឋ ដែលងាយរងគ្រោះ និងរងផលប៉ះពាល់ដោយជំងឺកូវីដ១៩។
ក្នុងដដែលនោះ ឯកឧត្តម ជាវ តាយ ក៏បានដឹកនាំអភិបាលរងខេត្ត មន្ទីរជំនាញ និងអភិបាលក្រុងស្រុក ចូលរួមក្នុងកិច្ចប្រជុំបន្ទាន់មួយ ជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ពាក់ព័ន្ធនឹងវិធានការការពារ ក្នុងការប្រារព្ធពិធីបុណ្យសព សម្រាប់អ្នកជំងឺកូវីដ១៩ ដើម្បីការពារមិនឱ្យចម្លងដល់គ្រួសារសព និងអ្នកចូលរួមពិធី តាមរយៈប្រព័ន្ធនិម្មិត Zoom នៅសាលប្រជុំ Video Conferenceផងដែរ៕
ប្រភព៖ រដ្ឋបាលខេត្តពោធិ៍សាត់
