ពិតជាគួរឲ្យអាណិតខ្លាំងណាស់ ខណៈកំពុងធ្វើដំណើរតាមផ្លូវសុខៗ ស្រ្តីម្នាក់អង្គុយលើម៉ូតូពីក្រោយ ស្រាប់តែត្រូវផ្លែដូង១ផ្លែ ធ្លាក់ពីដើមត្រូវចំក្បាល បណ្តាលឲ្យគាត់ធ្លាក់ពីម៉ូតូគួរឲ្យអាសូរ។ ហេតុការណ៍គ្រោះថ្នាក់ដ៏កម្រនេះ បានកើតឡើងនៅទីក្រុង George Town រដ្ឋ Penang ប្រទេសម៉ាឡេស៊ី កាលពីថ្ងៃទី២៦ ខែមិថុនា។
ក្នុងឃ្លីបបានបង្ហាញម្តាយកូន២នាក់បានជិះម៉ូតូឌុបគ្នា ធ្វើធ្វើដំណើរលើដងផ្លូវមួយ ហើយភ្លាមៗនោះ ស្រាប់តែផ្លែដូងមួយផ្លែ បានធ្លាក់មកចំក្បាលស្រ្តីជាម្តាយកំពុងអង្គុយខាងក្រោយ យ៉ាងពេញទំហឹងតែម្តង។ ការប៉ះទង្គិចដ៏មិនធម្មតានេះ បានបណ្តាលឱ្យមូកសុវត្ថិភាពត្រូវខ្ទាតចេញ ហើយស្ត្រីរងគ្រោះ ក៏ធ្លាក់ចេញពីម៉ូតូ បោកនឹងថ្នល់សន្លប់ស្តូកស្តឹងតែម្តង។ ហេតុការណ៍ទាំងមូលត្រូវបានថតបានដោយកាមេរ៉ាមុខរបស់រថយន្ត១គ្រឿងដែលបើកពីក្រោយ។
បើតាមនាង Yaya Gani កូនស្រីជនរងគ្រោះ បានឲ្យដឹងថា ក្រោយកើតហេតុ ម្តាយរបស់នាង ត្រូវបានបញ្ជូនទៅមន្ទីរពេទ្យ Penang ហើយគ្រូពេទ្យបានរកឃើញថា ម្តាយរបស់នាង បានបាក់ស្មាស្តាំ ដៃឆ្វេង និងឆ្អឹងជំនី២។
តាមប្រព័ន្ធផ្សព្វផ្សាយម៉ាឡេស៊ី បានឲ្យដឹងថា ករណីនេះគឺឧបទ្ទវហេតុ ហេតុនេះអាជ្ញាធរក្នុងតំបន់ បានត្រឹមសម្រេចចិត្តកាប់ដើមដូងនោះចោលប៉ុណ្ណោះ៕
