ព្រះចៅអធិការវត្តអារញ្ញសាគរ សហការជាមួយអាជ្ញាធរសង្កាត់សៀមរាប សង្កាត់សាលាកំរើក សង្កាត់ជ្រាវ និងសហភាពសហព័ន្ធយុវជនកម្ពុជាក្រុង ខេត្តសៀមរាប បានផ្តួចផ្តើមរៀបចំពិធីប្រណាំងទូក និងបណ្តែតប្រទីប ដើម្បីអបអរសាទរថ្ងៃចេញព្រះវស្សា និងដើម្បីរក្សាប្រពៃណីទំនៀមទម្លាប់របស់អ្នកស្រុកភូមិ ដែលមានតាំងពីយូរលង់ណាស់មកហើយ ក្រោមការចូលរួមឧបត្ថម្ភគាំទ្រពីព្រះសង្ឃ ថ្នាក់ដឹកនាំអាជ្ញាធរមូលដ្ឋាន ក្រុមការងារយុវជន សសយកខេត្ត ក្រុង អាជីវករ និងសប្បុរសជននានា ដោយបានបរិច្ចាគធនធានផ្ទាល់ខ្លួនទៅតាមសទ្ធាជ្រះថ្លាមានថវិកា និងភេសជ្ជ: សម្រាប់ជួយទ្រទ្រង់ឱ្យកម្មវិធីដំណើរការទៅបានយ៉ាងរលូន។ លោក ម៉ៃ សាមេត ចៅសង្កាត់សៀមរាប បានបង្ហាញនូវក្តីសោមនស្ស ដែលបានសហការរៀបចំកម្មវិធីនេះឡើង បន្ទាប់ពីត្រូវអាក់ខានដោយសារការឆ្លងរាលដាលនៃជំងឺកូវីដ-១៩។
លោកចៅសង្កាត់មានប្រសាសន៍ថា៖ អស់រយ:ពេលជាង ២ឆ្នាំមកហើយ ដែលបងប្អូនប្រជាពលរដ្ឋមិនបានជួបជុំប្រារព្ធពិធីជួបជុំឬពិធីបុណ្យនានានោះទេ ព្រោះតែភាពភ័យខ្លាច និងការអនុវត្តតាមការណែនាំ និងវិធានការនានាទប់ស្កាត់នៃការឆ្លងជំងឺកូវីដ-១៩។ តែដោយសារការយកចិត្តទុកដាក់ និងការលះបង់ខ្ពស់របស់ប្រមុខថ្នាក់ដឹកនាំរាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានស្វះស្វែងរកវ៉ាក់សាំងចាក់ជូនបងប្អូនគ្រប់ទីកន្លែងដោយឥតគិតថ្លៃ តាំងពីដូសមូលដ្ឋាន រហូតដូសជំរុញ ទើបជំងឺដ៍កាចសាហាវនេះបានថយចុះជាបន្តបន្ទាប់ និងសម្រេចបើកប្រទេសពេញលេញឡើងវិញ តាមរយ:ការរៀនរស់តាមបែបគន្លងថ្មីជាមួយនឹងកូវីដ-១៩។ ដូចនេះហើយ ទើបយើងទាំងអស់គ្នាមានឱកាសជួបជុំ និងប្រាព្ធពិធីផ្សេងៗ ឡើងវិញក្រោមម្លប់សុខសន្តិភាពតែមួយ។លោក ម៉ៃ សាមេត បានលើកយកសាវតានិងគោលបំណងទាក់ទងទៅនឹងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអមបុក ដែលជាពិធីមួយមានជាប់ពាក់ព័ន្ធនឹងប្រវត្តិសាស្ត្រដែលកងទ័ពខ្មែរធ្វើសង្គ្រាមបណ្តេញចម្ប៉ាផង និងក៏ជាប់ពាក់ព័ន្ធនឹងព្រះពុទ្ធសាសនា គឺការគោរពបូជាចំពោះព្រះចង្កូមកែវរបស់ព្រះសម្មាសម្ពុទ្ធនៅឋានភុជង្គនាគ និងដើម្បីរំឭកដល់ទន្សាយព្រះពោធិសត្វផង។ លោកបញ្ជាក់ថា៖ដោយឡែក ព្រះរាជពិធីអុំទូកធ្វើឡើងដើម្បីដឹងគុណដល់ព្រះគង្គា ព្រះធរណី និងរំលឹកមនុស្សឱ្យចេះថែរក្សាការពារទឹកដីឱ្យបានគង់វង្ស ចេះស្រឡាញ់គោរពព្រះធរណី គង្គា(ទឹកដី)ដោយចូលរួមសម្អាតបរិស្ថានឱ្យបានស្អាត។
ពិធីប្រណាំងទូកលក្ខណ:ប្រពៃណីនេះមានរយ:ពេល ២ថ្ងៃពីថ្ងៃទី១១ ដល់ថ្ងៃទី១២ ខែតុលា ឆ្នាំ២០២២ ប្រព្រឹត្តទៅនៅវេលារសៀល ស្ថិតចំណុចផ្លូវតាអាំ ក្នុងភូមិចុងស្រុក សង្កាត់សៀមរាប ក្នុងភូមិសាស្ត្រជាប់បឹងទន្លេសាប កីឡាករសុទ្ធតែជាបងប្អូនក្នុងមូលដ្ឋាននៃបណ្តាសង្កាត់នីមួយៗ មានទូកសរុបចំនួន៣០ទូក ក្នុងនោះទូក ង ចំណុះ ២២នាក់ចំនួន៤ ជាទូកកិត្តិយសទូកប្រណាំងដណ្តើមជ័យលាភី ២៦ទូក មួយទូកៗចំណុះ៦នាក់។ ចំណាត់ថ្នាក់ជ័យលាភីនឹងជ្រើសយកពីលេខ១ដល់លេខ៤ ដែលនឹងទទួលបានប្រាក់ឧបត្ថម្ភពីគណ:កម្មការរៀបចំពិធី ក្នុងពេលប្រកាសលទ្ធផល៕
