អគ្គនាយកដ្ឋានពន្ធដារព្រមានចាត់វិធានការក្តៅលើក្រុមហ៊ុនដែលមិនទូទាត់បំណុលពន្ធជូនរដ្ឋមុនដំណាច់ឆ្នាំនេះ

បើតាមសេចក្តីជូនដំណឹងរបស់អគ្គនាយកដ្ឋានពន្ធដារ បានបញ្ជាក់ថា ការបង់ពន្ធអាករ គឺជាកាតព្វកិច្ចរបស់ប្រជាពលរដ្ឋគ្រប់រូប ដើម្បីចូលរួមចំណែក ក្នុងការអភិវឌ្ឍសេដ្ឋកិច្ចជាតិលើគ្រប់វិស័យ។ កន្លងមក អគ្គនាយកដ្ឋានពន្ធដារ បានសង្កេតឃើញថា សហគ្រាសភាគច្រើនបានចូលខ្លួន មកធ្វើការទូទាត់បំណុលពន្ធ ប្រកបដោយស្មារតីទទួលខុសត្រូវខ្ពស់ ប៉ុន្តែនៅមានសហគ្រាសមួយចំនួនទៀត មិនបានចូលខ្លួនមកទូទាត់បំណុលពន្ធរបស់ខ្លួននៅឡើយទ បើទោះបីជាអគ្គនាយកដ្ឋានពន្ធដារ បានចេញលិខិតអញ្ជើញសហគ្រាសទាំងនោះជាច្រើន លើកច្រើនសារ ឱ្យមកធ្វើការទូទាត់បំណុលពន្ធក៏ដោយ។

អគ្គនាយកដ្ឋានពន្ធដារ បានបន្តថា អនុលោមតាមច្បាប់ ស្តីពីសារពើពន្ធរដ្ឋបាលសារពើពន្ធ អគ្គនាយកដ្ឋានពន្ធដារ មានសិទ្ធិក្នុងការអនុវត្តវិធានការតឹងទារបំណុលពន្ធ ចំពោះអ្នកជំពាក់បំណុលពន្ធគឺ ត្រូវព្យួរទុកជាបណ្តោះអាសន្ន នូវវិញ្ញាបនបត្រអាករលើតម្លៃបន្ថែម (អតប) របស់សហគ្រាសដោយមិនអនុញ្ញាតឱ្យ ស្នើសុំបង្វិលសងអាករ ឬប្រើប្រាស់ឥណទានអាករបានឡើយ។ ឃាត់ទុកជាបណ្តោះអាសន្ន នូវការស្នើសុំបង់ពន្ធប្រថាប់លើការផ្ទេរកម្មសិទ្ធិអចលនទ្រព្យ និងសហការជាមួយអគ្គនាយកដ្ឋានគយ និងរដ្ឋាករកម្ពុជា ដើម្បីបញ្ឈប់ប្រតិបត្តិការនាំចេញ-នាំចូល និងសហការជាមួយអាជ្ញាធរមានសមត្ថកិច្ច ដើម្បីបញ្ឈប់ ឬផ្អាកដំណើរការសហគ្រាស ជាបណ្តោះអាសន្ន។

ជាមួយគ្នានេះពន្ធដារនឹងសហការជាមួយធនាគារជាតិនៃកម្ពុជា ដើម្បីឃាត់ទុកគណនីធនាគាររបស់សហគ្រាស ឬ/ និង បុគ្គលពាក់ព័ន្ធ សហការជាមួយក្រសួងពាណិជ្ជកម្ម ដើម្បីឃាត់ទុកការចុះបញ្ជីក្រុមហ៊ុនថ្មី ឬ/ និង ការផ្ទេរភាគហ៊ុន, សហការជាមួយស្ថាប័នមានសមត្ថកិច្ច ដើម្បីទុកជាមោឃៈនូវលិខិតអនុញ្ញាត ឬអាជ្ញាប័ណ្ណផ្សេងៗ និងដាក់ពាក្យបណ្តឹងទៅតុលាការ ចំពោះសហគ្រាសដែលជំពាក់បំណុលពន្ធមិនព្រមមកធ្វើការទូទាត់។

ដូច្នេះដើម្បីចៀសវាងនូវផលវិបាកដែលកើតឡើងជាយថាហេតុ ចំពោះការអនុវត្តវិធានការតឹងទារបំណុលពន្ធនេះ ម្ចាស់សហគ្រាសដែលជំពាក់បំណុលពន្ធទាំងអស់ ត្រូវមកទូទាត់បំណុលពន្ធ ឬចូលខ្លួនមកដោះស្រាយបំណុលពន្ធ នៅនាយកដ្ឋានគ្រប់គ្រងអ្នកជាប់ពន្ធធំ ឬនៅនាយកដ្ឋានគ្រប់គ្រង អ្នកជាប់ពន្ធតូច និងមធ្យម ឬនៅសាខាពន្ធដារខេត្ត-ខណ្ឌ ដែលជាអង្គភាពគ្រប់គ្រងសហគ្រាស យ៉ាងយូរត្រឹមដំណាច់ឆ្នាំ២០២២ ជាកំហិត៕