ខេត្តបន្ទាយមានជ័យ ៖ នគរបាលស្រុកស្វាយចេក បានចេញប្រតិបត្តិកការបង្ក្រាបមុខសញ្ញារក្សាទុក និងប្រើប្រាស់នូវសារធាតុញៀ.នដោយខុសច្បាប់ ដោយឃាត់ខ្លួនបានចំនួន០៥នាក់ និងដកហូតវត្ថុតាងថ្នាំញៀ.នមួយចំនួន នៅវេលាម៉ោង១២ថ្ងៃត្រង់ ថ្ងៃទី២០ ខែមិថុនា ឆ្នាំ២០២២ នៅចំណុចស្ពានលេខប្រាំបីខាងត្បូង ស្រុកថ្មពួក ប្រហែល៣,០០០ម៉ែត្រ ព្រុំប្រទល់ស្រុកស្វាយចេក និងស្រុកថ្មពួក (ភូមិសាស្ត្រស្រុកថ្មពួក) ខេត្តបន្ទាយមានជ័យ ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានឲ្យដឹងថា ដំបូង កម្លាំងនគរបាលនៃអធិការដ្ឋាននគរបាលស្រុកស្វាយចេក ដឹកនាំដោយលោកវរសេនីយ៍ត្រី ដោក ខាំ អធិការរង បានចុះប្រតិបត្តិការរុករកជនសង្ស័យចំនួន០៣នាក់ ដែលធ្វើសកម្មភាពឆក់កាបូប ក៏ស្រាប់តែប្រទះឃើញមនុស្ស១ក្រុម មានគ្នីគ្នាចំនួន០៥នាក់ កំពុងតែអង្គុយលេងក្នុងខ្ទមទុកចោល០១កន្លែង ដោយមានការសង្ស័យកម្លាំងនគរបាលក៏សុំធ្វើការត្រួតពិនិត្យឆែកឆេរ ស្រាប់តែរកឃើញម្សៅក្រាមពណ៌សថ្លា០២កូនថង់ បំពង់កែវសម្រាប់ជក់០២ដើម ដែកកេស០១ និងកូនថង់សម្រាប់ច្រកថ្នាំមួយចំនួន ហើយក៏ឃាត់ខ្លួនមកអធិការដ្ឋាននគរបាលស្រុកស្វាយចេក តែម្តង ។
លោកអធិការបានបញ្ជាក់ថា ជនសង្ស័យទាំង០៥នាក់ រួមមាន ៖ ១- ឈ្មោះ រ៉ិត សំរ៉ាច់ ភេទប្រុស អាយុ២០ ឆ្នាំ នៅភូមិគំរូ ឃុំគំរូ ស្រុកថ្មពួក (ម្សៅក្រាម០១កូនថង់),២- ឈ្មោះ ដូង សំណាង (ហៅវិត) ភេទប្រុស អាយុ២៣ឆ្នាំ នៅភូមិវត្តចាស់ ឃុំថ្មពួក, ៣- ឈ្មោះ ដឿយ ដេត ភេទប្រុស អាយុ១៦ឆ្នាំ នៅភូមិថ្មពួក ឃុំថ្មពួក, ៤- ឈ្មោះ ម៉ី កាមុត ភេទប្រុស អាយុ២០ឆ្នាំ នៅភូមិថ្មពួក ឃុំថ្មពួក និង៥- ឈ្មោះ យឿត យ៉ា ភេទប្រុសអាយុ២៣ឆ្នាំ នៅភូមិថ្មពួក ឃុំថ្មពួក (ម្សៅក្រាម០១កូនថង់) ។
លោកអធិការបញ្ជាក់បន្តថា ជនសង្ស័យទាំង០៥នាក់នេះ កម្លាំងនគរបាលផ្នែកជំនាញប្រឆាំងគ្រឿងញៀ.ន បានធ្វើតេស្តទឹកនោម ជាលទ្ធផល គឺវិជ្ជមានទាំង០៥នាក់ ។ បច្ចុប្បន្នមុខសញ្ញាទាំង៥នាក់ ដែលរក្សាទុក និងប្រើប្រាស់គ្រឿងញៀ.ននេះ ត្រូវបានកម្លាំងផ្នែកជំនាញប្រឆាំងគ្រឿងញៀ.ន រៀបចំសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការតាមនីតិវិធី៕
