រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌជ្រោយចង្វារ ដឹកនាំផ្ទាល់ដោយលោកអភិបាលខណ្ឌ បានដឹកនាំកម្លាំងចម្រុះល្បាតក្នុងមូលដ្ឋាន ហើយក៏ឃាត់ខ្លួនក្រុមយុវជន និងយុវតី ចំនួន១៨នាក់ ដែលជិះម៉ូតូដេញវាយតប់គ្នា និងល្មើសបម្រាមគោចរ បញ្ជូនខ្លួនទៅកាន់អធិកាដ្ឋានខណ្ឌ ចាត់ការតាមនីតិវិធី។ ប្រតិបត្តិការនេះ បានធ្វើឡើងកាលពីវេលាម៉ោង១០យប់ ថ្ងៃទី៣ ខែសីហា ឆ្នាំ២០២១ នៅក្បែរការ៉ាសសាំងតូតាល់ ចំណុចក្បែរវត្តព្រែកលៀប តាមបណ្ដោយផ្លូវជាតិលេខ៦ ស្ថិតក្នុងសង្កាត់ព្រែកលៀប ខណ្ឌជ្រោយចង្វារ ។
ប្រភពពីលោកអភិបាលខណ្ឌជ្រោយចង្វារ បានប្រាប់អោយដឹងថា មុនកើតហេតុ គឺកម្លាំងគណៈបញ្ជាការឯកភាពខណ្ឌ បានដឹកនាំកម្លាំងចម្រុះចុះល្បាតក្នុងមូលដ្ឋានខណ្ឌ លុះមកដល់ចំណុចកើតហេតុខាងលើ ក៏បានប្រទះឃើញក្រុមក្មេងទំនើងចំនួន១៨នាក់ ក្នុងនោះមានស្រី៤នាក់ ជិះម៉ូតូច្រើនគ្រឿងបង្កហិង្សាដេញវាយតប់គ្នាពេញផ្លូវ និងល្មើសបម្រាមគោចរ ទើបកម្លាំងគណៈបញ្ជាការឯកភាពខណ្ឌ ចុះប្រតិបត្តិការឃាត់ខ្លួនតែម្តង។
លោកអភិបាលខណ្ឌបានបញ្ជាក់ទៀតថា ការបង្ក្រាប និងឃាត់ខ្លួននេះ គឺមិនមានករណីលើកលែង ឬក៏អប់រំដូចមុនទេ គឺអនុវត្តតាមនីតិវិធី ។ បន្ទាប់ពីឃាត់ខ្លួនក្រុមក្មេងទំនើងទាំងនោះហើយ ក៏ត្រូវបានលោកអភិបាល ទាក់ទងហៅក្រុមគ្រូពេទ្យស្ម័គ្រចិត្ត ចុះមកយកសំណាកតេស្តរហ័សរកមេរោគកូវីដ១៩ នៅទីតាំងឃាត់ខ្លួននោះតែម្តង ជាចេញលទ្ធផល គឹអវិជ្ជមានទាំង១៨នាក់ ។
បន្ទាប់ពីចេញលទ្ធផលតេស្តរួច ក្រុមក្មេងទំនើងទាំង១៨នាក់នោះ ត្រូវបានបញ្ជូនខ្លួនបន្តទៅកាន់អធិការដ្ឋានខណ្ឌជ្រោយចង្វារ ដើម្បីកសាងសំណុំរឿងបញ្ជូនខ្លួនបន្តទៅកាន់តុលាការចាត់ការបន្តតាមនីតិវិធីនៃជំងឺកូវីដ១៩ ត្រូវផាកពិន័យជាប្រាក់ និងជាប់ពន្ធនាគារពី៦ខែទៅ១ឆ្នាំ ដោយគ្មានករណីលើកលែងនោះទេ ៕
