ខេត្តកំពង់ស្ពឺ ៖ លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានប្រាប់ឱ្យដឹងនៅព្រឹកថ្ងៃទី១២ សីហា នេះថា លោកបានចាត់ឱ្យលោកស្នងការរងទទួលផែន បុគ្គលិកចុះធ្វើការស្រាវជ្រាវបន្ថែម និងធ្វើការដកលោកវរសេនីយ៍ត្រី អ៊ុំ ចំរើន អធិការនគរបាលស្រុកបសេដ្ឋ មកបញ្ឈរជើងហើយ យោងតាមពាក្យបណ្តឹងរបស់មន្ត្រីថ្នាក់ក្រោម។ សូមរំលឹកថា៖ លោកអធិការនគរបាលស្រុកបសេដ្ឋ ត្រូវកូនចៅប្តឹងទៅសម្ដេចក្រឡាហោម ស ខេង ប្តូរលោកចេញ
សូមរំលឹកផងដែរថា មន្ត្រីនគរបាលក្រោមឱវាទជាច្រើននាក់នៅស្រុកបសេដ្ឋ ខេត្តកំពង់ស្ពឺ រាប់ទាំងពីលោកអធិការរង ប្រធានផ្នែក នាយរងផ្នែក និងនាយនគរបាលតាមបណ្តាលប៉ុស្តិ៍រដ្ឋបាលផងនោះ បានរួមគ្នាដាក់ពាក្យបណ្ដឹង ទៅកាន់សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ, ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ ធ្វើការស្នើសុំ ឲ្យផ្លាស់ប្តូរអធិការនគរបាលស្រុកបសេដ្ឋ លោក អ៊ុំ ចំរើន ចេញដោយសារតែលោកអធិការ រូបនេះ បានប្រព្រឹត្តកំហុសនិង អំពីពុករលួយ ជាច្រើន ដែលពួកគាត់មិនអាចទទួលយកបាន និងមិនព្រមឲ្យបន្តកាន់តំណែងជាអធិការនគរបាលស្រុក បសេដ្ឋតទៅទៀតនោះទេ។
យោងតាមពាក្យបណ្តឹង របស់មន្ត្រីនគរបាលស្រុកបសេដ្ឋ ដែលអ្នកសារ ព័ត៌មាន ទទួលបាននៅព្រឹកថ្ងៃទី១១ ខែសីហា ឆ្នាំ២០២១នេះ បានរៀបរាប់ថា លោក អ៊ុំ ចំរើន មានឋានន្តរស័ក្តិ វរសេនីយ៍ត្រី ជាអធិការនគរបាលស្រុកបសេដ្ឋ បានប្រព្រឹត្តទង្វើមួយចំនួនមានដូចជា៖
ទី០១.រាល់ការតែងតាំង និងផ្លាស់ប្ដូរមុខងារមន្ត្រីក្រោមឱវាទ តែងទាមទារលាភសក្ការៈ ពោលគិតតែផលប្រយោជន៍ផ្ទាល់ខ្លួន
ទី០២.ចំពោះការងារកសាងអង្គភាព និងហេដ្ឋារចនាសម្ព័ន្ធផ្សេងៗវិញ គ្មានរីកចម្រើនទាល់តែសោះ
ទី០៣.មិនឲ្យតម្លៃដល់មន្ត្រីក្រោមឱវាទរបស់ខ្លួន ដឹកនាំខ្វះក្រមសីលធម៌ ហើយគ្មានការទទួលខុសត្រូវ
ទី០៤.ចំពោះចរិតឫកពាមិនសមជាថ្នាក់ដឹកនាំ ឬមិនធ្វើជាគំរូដល់កូនចៅ ជារឿយៗបានជេរប្រមាថមើលងាយកូនចៅក្រោមឱវាទ តាមវិទ្យុទាក់ទង មិនស្គាល់ចាស់ស្គាល់ក្មេង និយាយអួតក្អេងក្អាងថា ខ្លួនមានតួនាទីធំ និងមានអ្នកនៅពីក្រោយខ្នងជាអ្នកធំផងដែរ។ ជាមួយគ្នានេះ ក្រុមមន្ត្រីនគរបាលទាំងនេះ បានចោទថា លោកវរសេនីយ៍ត្រី អ៊ុំ ចំរើន គ្មានភាពជាអ្នកដឹកនាំឡើយ ជាពិសេសខ្វះសាមគ្គីភាពផ្ទៃក្នុងយ៉ាងខ្លាំង ជាហេតុនាំឲ្យសុំធ្វើការផ្លាស់ប្តូរចេញ ដាក់អធិការថ្មីជំនួសវិញ។
តាមប្រភពព័ត៌មានបានឱ្យដឹងទៀតថា កន្លងមកលោក អ៊ុំ ចំរើន រូបនេះបានប្រព្រឹត្តអំពើពុករលួយ ស៊ីសំណូកសូកប៉ាន់ ធ្វើការដោះលែង ក្រុមជនល្មើសគ្រឿងញៀន ជាច្រើនករណីក្រៅប្រព័ន្ធតុលាការមិនរាយការណ៍ទៅថ្នាក់លើនោះទេ៕
