#ស្វាយរៀង៖ នគរបាលបានចាប់ឃាត់ខ្លួនជនសង្ស័យម្នាក់បន្ទាប់ពីស្រវឹងស្រា បានប្រើហឹង្សាដោយយកដាវកាប់ទៅលើឪពុកម្ដាយបណ្ដាលឱ្យរងរបួស។ មូលហេតុពួកគាត់ចូលទៅឃាត់កុំឱ្យឈ្លោះជាមួយប្រពន្ធ។ ករណីនេះបានកើតឡើងនៅភូមិទាហានក្រោម សង្កាត់ស្វាយតឿ ក្រុងស្វាយរៀងកាលពីយប់ថ្ងៃទី២៥ខែកញ្ញា ឆ្នាំ២០២១ ។
សមត្ថកិច្ចបានឱ្យដឹងថា ជនសង្ស័យឈ្មោះ ទេព ឆើត អាយុ ៣៣ឆ្នាំ ជាកម្មកររោងចក្រ រស់នៅភូមិ ទាហានក្រោម សង្កាត់ស្វាយតឿ ក្រុងស្វាយរៀង។ ចំណែកឪពុកឈ្មោះ ទេព ឈីន អាយុ ៥៣ឆ្នាំ ជាអនុភូមិត្រូវមួយដាវចំក្រោមគុម្ពត្រចៀកខាងឆ្វេង រងរបួស។ ម្ដាយឈ្មោះ សូ យិន អាយុ ៥០ឆ្នាំ របួសត្រូវចំកដៃខាងស្ដាំ។
ក្រោយកើតហេតុ សមត្ថកិច្ចបានចាប់ជនសង្ស័យបញ្ជូនទៅអធិការដ្ឋាននគរបាលក្រុងស្វាយរៀងដើម្បីចាត់ការបន្ត៕
