ខេត្តកំពង់ស្ពឺ ៖ បន្ទាប់ពីក្រុមប្រឹក្សាវិន័យបើកអង្គប្រជុំកាលពីថ្ងៃទី១ ខែកញ្ញា ឆ្នាំ២០២២ រួចមក លោកវរសេនីយ៍ត្រី គិត វៃ ត្រូវបានដកយកមកបញ្ឈរជើង ដើម្បីអនុវត្តវិន័យលើករណីដែលលោកហ៊ានចេញលិខិតបញ្ជាក់ឲ្យមុខសញ្ញាសង្ស័យក្នុងករណីគ្រឿងញៀ.ន ដែលចោទប្រកាន់ដោយតំណាងអយ្យការអមសាលាដំបូងខេត្តកំពង់ស្ពឺ។
ប្រភពពីមន្ត្រីនគរបាលស្រុកគងពិសី បានបង្ហើបប្រាប់ថា ក្រោយពេលទទួលដំណឹងក្រុមប្រឹក្សាវិន័យស្នងការដ្ឋាននគរបាលខេត្ត បើកអង្គប្រជុំ ដើម្បីវិនិច្ឆ័យអំពីកំហុសរបស់គាត់លោក គិត វៃ សាមីខ្លួនផ្ទាល់បានស្វះស្វែងរកអន្តរាគមន៍ ដើម្បីបានរួចផុតពីការដកទៅបញ្ឈរជើង និងអនុវត្តពិន័យ តែហាក់បីដូចជាមិនសមបំណងនោះទេ ចុងក្រោយនៅតែទទួលរងនូវការដកមកបញ្ឈរជើងដដែល។
ចំណែកមន្ត្រីជាន់ខ្ពស់ នៃស្នងការដ្ឋាននគរបាលខេត្តកំពង់ស្ពឺ ក៏បានបញ្ជាក់ប្រាប់ផងដែរថា ករណីលោកនាយប៉ុស្តិ៍ព្រៃវិហារ គឺលោកវរសេនីយ៍ត្រី គិត វៃ តាមប្រសាសន៍លោកស្នងការ គឺមិនអាចលើកលែងបានឡើយ បើទោះជាសាមីខ្លួនស្វែងរកអន្តរាគមន៍ក្តី។ ពេលនេះ លោកវរសេនីយ៍ត្រី គិត វៃ ត្រូវដកមកបញ្ឈរជើងនៅខេត្តហើយ ហើយត្រូវបង្ហាញមុខជារៀងរាល់ពេលម៉ោងកំណត់ ដោយមិនអាចអាក់ខានបានឡើយ។
ដោយឡែកកិច្ចការដែលនៅសេសសល់ គឺប្រគល់ឲ្យនាយប៉ុស្តិ៍ស្តីទីអនុវត្តបន្តរង់ចាំមានការសម្រេចជាថ្មីពីថ្នាក់ដឹកនាំ។
ករណីលោកមេប៉ុស្តិ៍ព្រៃវិហារនេះដែរ មន្ត្រីនគរបាលស្រុកគងពិសី ជាច្រើនក៏បានលើកឡើងផងដែរថា បន្ទាប់ពីមេប៉ុស្តិ៍ចាស់ចូលនិវត្តន៍ទៅតាមរយៈក្រុមការងារបក្សបានស្នើសុំតាមឋានានុក្រមទៅថ្នាក់លើ ដើម្បីដាក់រងប៉ុស្តិ៍ម្នាក់ឲ្យកាន់តួនាទីជាមេប៉ុស្តិ៍នេះ ស្រាប់តែក្រោយមកស្ថានការណ៍បានក្រឡាប់ចាក់ធ្លាក់សេចក្តីសម្រេចពីលើមកតែងតាំងលោក គិតវៃ ជាមេប៉ុស្តិ៍ទៅវិញ។ តាំងតែពីចូលកាន់ដំណែងជាមេប៉ុស្តិ៍មក លោក គិត វៃ ធ្វើអ្វីស្រេចតែចិត្តឯង អាងខ្លួនមានខ្សែ មានខ្នងបង្អែក ជាក់ស្ដែងដូចជា
ករណីចេញលិខិតបញ្ជាក់កិរិយាមាយាទឲ្យមុខសញ្ញាសង្ស័យក្នុងករណីគ្រឿងញៀ.ននេះជាដើមថា ជាមនុស្សល្អ។
និយាយជារួមទៅ លោក គិត វៃ មិនមែនមិនដឹងថា ជនសង្ស័យទាំង៤នាក់ ជាមុខសញ្ញានោះទេ។ ព្រោះកន្លងមក ខាងប៉ុស្តិ៍ក៏ធ្លាប់បានទទួលដីកាយកទៅប្រគល់ឲ្យមុខសញ្ញាទាំងនោះដែរ តែទំនងជាអាងថា ខ្លួនមានខ្នង គ្មានអ្នកណាធ្វើអ្វីខ្លួនកើត ក៏ចេះតែចេញទៅ ចុងក្រោយទទួលបានលទ្ធផលត្រឡប់មកខ្លួនវិញ គឺជាទីគាប់ចិត្តតែម្ដង។
ក្រុមមន្ត្រីនៃអធិការដ្ឋាននគរបាលស្រុកគងពិសី ដែលដឹងរឿងជាច្រើនបានខ្សឹបខ្សៀវគ្នាតាមតុកាហ្វេថា តើលោក គិត វៃ ត្រូវដកចេញលែងឲ្យកាន់តំណែងជាមេប៉ុស្តិ៍នេះទៀត ឬក៏ត្រូវបញ្ឈរជើងអនុវត្តវិន័យបានយូរកម្រិតណា? ហើយអ្នកខ្លះក៏បានលើកឡើងថា តើលោកគិត វៃ អាចត្រឡប់មកបន្តធ្វើជាមេប៉ុស្តិ៍វិញដែរឬទេ? តែអ្នកខ្លះក៏បានលើកឡើងបែបប្រឆាំងថា នេះជាកំហុសតិចតួច មិនគួរដកចេញពីមុខតំណែងនោះទេ គ្រាន់តែអនុវត្តវិន័យទៅ គឺសមរម្យហើយ តែបើចង់ត្រឡប់មកកាន់តំណែងជាមេប៉ុស្តិ៍វិញ សាមីខ្លួនគួរតែចេះរកមើលកំប៉ុងជើងធូបណា ដែលគួរយកធូបទៅដោតសែន ទើបជាការល្អ។
សូមរំលឹកថា កាលពីពេលថ្មីៗនេះ សារសំឡេងមួយចំនួនដែលគេស្គាល់ច្បាស់ថា ជាសំឡេងរបស់លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ ដែលហាក់បីដូចជា ធ្វើការស្ដីបន្ទោសទៅលើលោកមេប៉ុស្តិ៍ព្រៃវិហារ ស្រុកគងពិសី មួយរូប គឺលោក គិត វៃ ដែលហ៊ានចេញលិខិតបញ្ជាក់កិរិយាមាយាទឲ្យជនជាប់សង្ស័យក្នុងករណីគ្រឿងញៀ.នចំនួន៤រូប ក្នុងសារសំឡេងបានបញ្ជាក់ថា លោកព្រៃវិហារគងពិសី លោកមានអំណះអំណាងស្អី ដែលលោកហ៊ានបញ្ជាក់មួយ ហើយមួយទៀត លោកគិតយ៉ាងម៉េចពេលនេះ? អ្នកណាមួយដែលឲ្យលោកធ្វើរបៀបហ្នឹងបញ្ជាក់ថា អត់មានជាប់គ្រឿងញៀ.ន ខណៈដែលអយ្យការ (ព្រះរាជអាជ្ញា) បានចោទប្រកាន់រួចទៅហើយ។
បញ្ជាក់ហើយផ្ញើឯកសារទៅអយ្យការទៀត លោកស្នងការបានសង្កត់ធ្ងន់ថា តើអ្នកណាមួយបញ្ជាឲ្យលោកធ្វើ? ឬក៏លោកធ្វើដោយចិត្តឯង ជ្រុលហួសហេតុពេកហើយ?។ សាលាឃុំបញ្ជាក់វាជារឿងមួយផ្សេងនេះ នគរបាលប៉ុស្តិ៍បញ្ជាក់ចុះលេខនគរបាលប៉ុស្តិ៍ទៀត ធ្វើអីធ្វើយ៉ាងហ្នឹង? ។ ក្នុងនោះផងដែរ លោកស្នងការក៏បានបញ្ជាទៅលោកស្នងការរង គឺឧត្តមសេនីយ៍ត្រី ម៉ាត់ ធុច ដែលទទួលបន្ទុកករណីគ្រឿងញៀ.នឲ្យពិនិត្យមើលលើសំណុំរឿងនេះផងដែរថា តើលិខិតបញ្ជាក់ធ្វើឡើងស្របពេលជាមួយសំណុំរឿងមួយយ៉ាងណា ហើយខ្ញុំស៊ីញ៉េរដែរអត់ទេ? ។ ហើយបើអត់ទេ អានេះបញ្ជាក់នៅពេលក្រោយ ហើយដាក់ទៅតុលាការខ្លួនគាត់ហើយ។
